У Беларускім доме ў Варшаве тэатральная студыя «Купалінка» прадставіла новы дзіцячы спеўнік «Мілыя мясціны». Гледачы пазнаёміліся з песнямі Ларысы Сімаковіч і ўбачылі тэатралізаванае прадстаўленне, натхнёнае беларускімі традыцыямі.
Беларуска, рэжысёр і харэограф Ларыса Сімаковіч, вядомая сваёй працай у фальк-тэатры «Госьціца», у эміграцыі стварыла серыю песень.
Яны прысвечаны святам, якія вельмі любяць дзеці: Дню маці, Калядам, Новаму году, пачатку лета і знаёмым героям: летняму дожджыку, працавітаму вожыку і легкадумнаму казлу.
Дзеці і дарослыя беларускай тэатральнай студыі «Купалінка» вывучылі і выканалі песні для поўнай залы ў Беларускім доме.
Рэжысёр і кіраўніца студыі «Купалінка» Наталля Локіць адзначыла, што супольныя рэпетыцыі і выступы ствараюць моцныя эмоцыі, і ўсёй трупе цікава і хвалююча выступаць разам.
Свята прайшло на вясёлым настроі, гледачы нават гулялі ў снежкі з артыстамі падчас зімовай песні.
— Наша мэта як педагогаў — не толькі развіваць беларускую культуру, але і вучыць дзяцей быць добрымі і моцнымі людзьмі, якія здольны на салідарнасць. Нам было лёгка і весела рэпетаваць, і мы адчуваем вялікую патрэбу ў новых, цікавых беларускіх песнях для дзяцей, — сказала Наталля Локіць.
Стварэнне дзіцячага спеўніка «Мілыя мясціны» стала новай важнай падзеяй для беларусаў. Выкладчыкі студыі абяцаюць, што кожны жадаючы зможа атрымаць спеўнік на наступных выступах «Купалінкі».
Тэатр беларускіх эмігрантаў у Варшаве «Купалінка» разам з рэжысёрам Наталлей Локіць, якая пераехала з Жодзіна ў Польшчу ў 2022 годзе, ужо падарыў гледачам шэраг пастановак. Гэта і калядныя спектаклі ў розных гарадах Польшчы, і «На Вальніцы» па матывах рамана Уладзіміра Някляева, і тры п'есы сучасных беларускіх аўтараў для дарослых і дзяцей, і вялікія імпрэзы на Купалле на беразе Віслы.
Даслаць навіну: @ex_presslive
Добро пожаловать в реальность!