Недалёк ад горада Прато ў Італіі адбыўся турнір салідарнасці. На яго прыехалі беларусы і італьянцы з Тасканы, П'емонту, Лігурыі, Эміліі-Раман'і, Лацыё і Кампаніі. Арганізавала падзею беларуска Юлія Юхно. Яна распавяла EX-PRESS.BY, чаму гэта не проста спартыўны івэнт.
Юлія — грамадзянская актывістка і кіраўніца асацыяцыі «Талака» і Народнай Амбасады Беларусі ў Італіі. Каардынуе гуманітарныя праекты, выступае на публічных мерапрыемствах, у тым ліку на кангрэсах прафсаюзаў Італіі (CISL Italia), працуе з палітыкамі.
— Турнір праводзім ужо другі год запар, — кажа беларуска. — У гэтым годзе сабралася больш за 50 чалавек, былі разыграныя тры кубкі: валейбол (дарослы і дзіцячы) і эстафеты. Праводзілі ў два дні, каб больш пабыць разам, паспяваць і пагутарыць.
Дзяўчына дадае:
— Вельмі натхняльна бачыць столькі беларусаў разам, было таксама прыемна, што завітала столькі італьянцаў. Была вельмі цёплая, сяброўская атмасфера, не гледзячы на тое, што не ўсе разумелі адзін аднаго. Буду намагацца і далей арганізоўваць спартыўныя і культурныя падзеі, бо яшчэ на Радзіме зразумела, як для беларусаў важна быць разам. Асабліва, калі мы адарваныя ад дому і няма магчымасці вярнуцца.
Па словах гераіні, гэта быў не толькі спартыўны івэнт, але і цудоўная магчымасць сабрацца разам, падтрымаць адно аднаго і паказаць, што нашая салідарнасць мацнейшая за ўсе перашкоды.
Даслаць навіну: @ex_presslive
Добро пожаловать в реальность!