21 чэрвеня на беразе Віслы ў Варшаве беларуская супольнасць зноў збярэцца разам, каб адсвяткаваць Купалле — старадаўняе свята летняга сонцастаяння. Ужо чацвёрты год запар яго арганізуе тэатральная студыя «Купалінка», якая ператварыла традыцыю ў штогадовы сімвал яднання беларусаў у польскай сталіцы.
Ад вогнішча да супольнасці
Як распавядаюць заснавальнікі «Купалінкі», ідэя святкавання нарадзілася сама сабой:
— Прырода, рака, вянкі, агонь, спевы... Гэта тое, што жыве ў нашай памяці з дзяцінства. У эміграцыі такія рэчы набываюць асаблівае значэнне — іх проста нельга ігнараваць.
Першае Купалле стваралася як камернае мерапрыемства для «сваіх», але колькасць гасцей пераўзыйшла ўсе чаканні. Беларусы прыходзілі сем’ямі, у нацыянальных строях, з усмешкамі. Так свята вырасла ў нешта большае — сімвал супольнасці, месца, дзе людзі знаходзяць сваю культуру праз музыку, танцы і абрады.
— Мы не ставім сябе гаспадарамі, — з усмешкай кажуць арганізатары. — Купалле — гэта народнае, і мы толькі адкрываем карагод і запрашаем: «Далучайцеся, тварыце разам».
Студыя, дзе нараджаецца сяброўства
Тэатральная студыя «Купалінка» працуе з 2020 года. Тут займаюцца дзеці, падлеткі і дарослыя. Людзі знаходзяць не толькі магчымасць творча развівацца, але і сяброў, падтрымку, сувязь з культурай:
— Мы бачылі, як дзеці вырасталі ў нас на вачах. Навучыліся гаварыць па-беларуску, удзельнічалі ў спектаклях, расталі разам. Зараз у студыі шэсць груп, і ўсе заняткі — ад акцёрскага майстэрства да спеваў — вядуцца па-беларуску і па-ўкраінску.
Нават калі ўдзельнікі часам размаўляюць па-расейску, у студыі гучаць родныя мовы — багатыя на метафары і літаратурныя вобразныя формы.
Купалле-2025: што чакае гасцей
Святочная праграма абяцае быць насычанай. Госці змогуць далучыцца да карагодаў, спяваць разам, вучыцца абрадавым песням на майстар-класах. Увечары запланаваны канцэрты гуртоў «Няміга» і «Трава», народныя танцы пад дуду і жывая музыка на любы густ.
Артысты студыі «Купалінка» таксама падрыхтавалі спецыяльную праграму: спевы, танцы, абрадавыя элементы і сюрпрызы. Будзе латарэя з каштоўнымі прызамі, а ўпершыню ганаровым госцем свята стане Украіна.
— Нашы ўкраінскія выкладчыкі самі прапанавалі далучыцца, і гэта нас вельмі ўразіла. Купалле робіцца супольным святам, і сёлета будуць таксама ўкраінскія песні і абрады.
Для дзяцей — свая казка
Для маленькіх гасцей будзе працаваць дзіцячая зона — «міні-Купалле», дзе Маляваныч дапаможа акунуцца ў чароўны свет традыцый. Майстар-класы, пляценне вяночкаў, іх сплаў па вадзе, гульні, кірмаш, грыль — усё для таго, каб стварыць сапраўдную сямейную атмасферу.
І, як заўжды, арганізатары пакідаюць адзін сакрэт:
— Хто будзе весці «Купалле-2025» — няхай пакуль застанецца таямніцай. Але мы ўпэўненыя: вам спадабаецца! Прыходзьце ўсёй сям’ёй і няхай гэтае Купалле стане вашым асабістым цудам.
Хочаце расказаць сваю навіну? Пiшыце: @ex_presslive
Добро пожаловать в реальность!