У Музеі Вольнай Беларусі ў Варшаве адбылася прэм’ера спектакля «Заяц варыць піва» — камедыйнай пастаноўкі тэатра-студыі «Купалінка». Ён раскрывае балючую, але знаёмую кожнаму беларусу рэчаіснасць праз алегорыі, гумар і сум па радзіме.
П’еса была напісана яшчэ ў 1990-х беларускім літаратуразнаўцам і драматургам Сяргеем Кавалёвым па матывах казак і вершаў Уладзіміра Караткевіча. Аднак яе тэмы — улада, страх, супраціў і мара пра свабоду — гучаць сёння асабліва востра. Паставіла спектакль Наталля Локіць.
Казачная форма — рэальнае адлюстраванне
Дзеянне разгортваецца ў выдуманым птушыным царстве, дзе кіруе дыктатар Арол. Галоўны герой — Верабей — спрабуе змагацца з несправядлівасцю, але менавіта філосаф Заяц становіцца тым, хто гатовы рызыкаваць, каб яго абараніць.
Кожны вобраз у спектаклі сімвалічны: Чапля — выканаўчая ўлада, Сава — абыякавасць, а Дрозд — служка сістэмы. Дразда сыграў польскі актор Матэуш, які спецыяльна вывучыў беларускую мову дзеля ўдзелу ў пастаноўцы.
Спектакль, які прымушае думаць
Паказ адбываўся на беларускай мове з польскімі субцітрамі. Гледачы — беларусы, што жывуць у Варшаве і палякі — рэагавалі вельмі эмацыйна: смех чаргаваўся з цішынёй, а пасля — з апладысментамі і слязамі.
На прэм’еры прысутнічалі вядомыя прадстаўнікі беларускай культуры, якія таксама працуюць з «Купалінкай» — Аляксандр Ждановіч (Маляваныч) і Святлана Зелянкоўская.
«Купалінка» — ад студыі да голасу эміграцыі
Тэатр «Купалінка» быў заснаваны як дзіцячая студыя беларускіх эмігрантаў, але з 2022 года аб’яднаў і дарослых удзельнікаў. Для многіх актораў гэты спектакль стаў асабістым выказваннем, бо ўсе яны ведаюць, што такое жыць ва ўмовах несправядлівасці ў Беларусі.
«Заяц варыць піва» — гэта не толькі спектакль, але і спосаб захоўваць беларускую мову, перадаваць праўду і гаварыць пра важнае, нават калі зусім няпроста.
Даслаць навіну: @ex_presslive
Добро пожаловать в реальность!