У Варшаве адбылося першае чытанне найноўшай п’есы Сяргея Кавалёва «Лабірынты Власта», пастаўленае дарослай групай студыі «Агмень» («Купалінка»). Рэжысёр — ураджэнка Жодзіна Наталля Локіць. Пастаноўка, заснаваная ў тым ліку на тэкстах Вацлава Ластоўскага, выйшла за межы звычайнай чыткі і была набліжаная да паўнавартаснага спектакля.
Прэм’ерная чытка адбылася ў нядзелю ў Варшаве і сабрала гледачоў, зацікаўленых сучаснай беларускай драматургіяй і тэатрам «Купалінка». П’еса «Лабірынты Власта», створаная з выкарыстаннем фрагментаў аповесці Вацлава Ластоўскага «Лабірынты», была напісана перад 2020 годам для Купалаўскага тэатра... Але так адбылося, што новае асэнсаванне гістарычных і культурных сюжэтаў, давялося увасабляць «Купалінцы».
Рэжысёр Наталля Локіць, ураджэнка Жодзіна, у гэтай працы зрабіла акцэнт на дынаміцы і візуальнай выразнасці. Яе падыход дазволіў выйсці за межы традыцыйнай сцэнічнай чыткі: замест статычнага выканання гледачы ўбачылі амаль паўнавартасны спектакль з выразнай рытмікай і эмацыйнай напругай.
Нягледзячы на фармат чытання, пастаноўка атрымалася візуальна насычанай. Студыя «Купалінка» прапанавала жывую і экспрэсіўную інтэрпрэтацыю — з мастацкім афармленнем і выкарыстаннем вобразаў цягніка, полацкіх лабірынтаў, кансператыўнай кватэры і засценкаў ГПУ.
Пасля паказу адбылася дыскусія з удзелам аўтара п’есы і рэжысёра. Гледачы адзначылі трапны падбор акцёраў і цэласнасць рэжысёрскага рашэння.
На наступны дзень драматург Сяргей Кавалёў, падзяліўся ўражаннямі ў сацыяльных сетках. Паводле яго, пастаноўка стала для яго прыемнай нечаканасцю:
«“Купалінка” зрабіла не класічную, статычную чытку, а амаль што спектакль: з дынамікай, экспрэсіяй, мастацкім афармленнем… На абмеркаванні ўсе адзначылі трапны падбор акцёраў на ролі».
Аўтар таксама прызнаўся, што ў працэсе пастаноўкі па-новаму зірнуў на ўласны твор:
«Я зразумеў, што пісаў п’есу пра Вацлава Ластоўскага, а атрымалася п’еса пра жанчын: Анну Сняжынскую, Рыту Лейман, Ядвігу Шыпілу…»
Даведка:
Сяргей Кавалёў — беларускі драматург, літаратуразнаўца, доктар філалагічных навук, аўтар шматлікіх п’ес, якія ставіліся ў розных краінах.
Хочаце даслаць сваю навіну? Мы на сувязі: @ex_presslive
Добро пожаловать в реальность!