Рэжысёрка і актрыса з Жодзіна Наталля Локіць пераўвасобіла і пераасэнсавала раман «Гэй Бэн Гіном» Уладзіміра Някляева. Разам з акцёрамі тэатра-студыі «Купалінка» яна прадставіла публіцы гісторыю пра беларускія сны, легенды і галоўнага героя рамана — Янку Купалу.
Першыя фрагменты спектакля «На Вальніцы» паказалі ў Варшаве на Дзень волі. І вось адбылася прэм’ера ў Мультыкультурным Цэнтры.
У спектаклі задзейнічаны дзеці, падлеткі, дарослыя. Усе яны — эмігранты з Беларусі. Кожны акцёр у тэатры значны, і кожнае, нават маленькае дзіця ведае значэнне кожнага слова і дзеяння.
Зянон Пазьняк з'явіўся на прэм'еры выпадкова.
Рэжысёрка Наталля Локіць падзялілася з EX-PRESS.LIVE сваімі ўражаннямі ад прэм'еры:
— Заўжды хвалююся, каб хто чаго не забыўся, каб своечасова выйшлі, каб была цішыня за кулісамі. Узрадавала, што маі кацяняты зрабілі амаль немагчымае, паказаўшы велічэзны і складаны для іх матэрыял цалкам. Там яшчэ шмат працы, але я і яны ўбачылі вынік.
Рэжысёрка кажа:
— Дзеці натхніліся і зразумелі, што іх праца прыносiць шмат радасці не толькі гледачам, але, а гэта галоўнае, ім самім. Дарослыя групы якасна і натхнёна адпрацавалі. Яны ўвогуле адказныя і суперпрацаздольныя!
У верасні «Купалінка» яшчэ раз пакажа спектакль «На Вальніцы». А Наталля Локіць распавяла пра планы і мары:
— Мару паказаць яго яшчэ шмат разоў не толькі ў Варшаве. Таму будзем чакаць прапаноў ад беларусаў з усёй Польшчы. Спадзяёмся ў верасні ўбачыць у сябе спадара Уладзіміра Някляева і, канешне, шматлікіх беларусаў, а можа і палякаў.
Хочаце расказаць сваю гiсторыю? Пiшыце: @ex_presslive.
Добро пожаловать в реальность!