У 2022 годзе рэжысёр і актрыса Наталля Локіць пачала працаваць у тэатры-студыі «Купалінка» для дзяцей мігрантаў у Варшаве. На гэтым тыднi адбудзецца прем'ера новага спектакля «На Вальніцы», у якiм акторы — беларусы ў эміграцыі ад 6 да 40 гадоў.
25 сакавіка, у Дзень Волі ў Варшаве адбыўся паказ часткі спектакля «НА ВАЛЬНІЦЫ», які рэжысёр з Жодзіна Наталля Локіць ставіць па ўласным сцэнары з урыўкаў кнігі Уладзіміра Някляева «Гэй Бэн Гіном».
Зараз спектакль «НА ВАЛЬНІЦЫ» — паэтычны, музычны, вакальны і пластычны — гатовы да паказу гледачам на вялікай сцэне. 16 чэрвеня ў пятніцу ў Мультыкультурным Цэнтры ў Варшаве (pl.Hallera) адбудзецца яго прем'ера.
Наталля пачала чытаць раман Уладзіміра Някляева «Гэй Бэн Гіном», калі прыехала ў Варшаву. Знайшла кнігу на кніжнай паліцы ў сяброў.
Вось што кажа Наталля:
«Беларуская мова мала дзе гучала, я заўсёды хацела ведаць, ці ёсць у яе шанцы. Для мяне гэта было галоўным пытаннем. Раман Уладзіміра Някляева «Гэй Бэн Гіном» ўразіў мяне яшчэ і тым, што адказвае на гэта маё пытанне. У кнізе шмат пра Янку Купалу. У кнізе казкі і легенды, якія маці расказвала сыну. Раман вялічэзны, да таго ж складаны, містычны, і гэта быў бы хутчэй фільм. Але я ўзяла легенды і казкі і верш Купалы «Як жыла і жывеш, будзеш жыць, Беларушчына».
«Сціхнуць буры, і ўсё стане на сваё месца», — гаворыць нам Купала. Мы ў гэта верым.
У спектаклі занятыя артысты трох узроставых груп тэатру-студыі «Купалінка», прагучаць традыцыйныя беларускія песні, якіх вы даўно ня чулі. А напрыканцы мы ўсе — і акторы, і гледачы, — заспяваем разам».
Добро пожаловать в реальность!