Варшаўскі тэатр беларускіх эмігрантаў «Купалінка» са спектаклям «Шлях да Бэтлеему» рэжысёра Наталлі Локіць з Жодзіна завяршыў першы гастрольны тур. Тэатр запрасілі ў Беласток, Кракаў і Уроцлаў.
Пасля паказаў спектакля «Шлях да Бэтлеему» на Божае Нараджэнне ў Варшаве, тэатр атрымаў шмат водгукаў. Пастаноўка біблейскай гісторыі, якая стала расповедам і пра сучаснае беларускае грамадства, была настолькі ўдалая, што пра яе даведаліся ў розных гарадах Польшчы і запрасілі тэатр да сябе.
Першая гастрольная паездка была ў Беласток. Гледачамі спектаклю сталі беларусы і ўкраінцы, якія жывуць у гэтым горадзе.
Другі горад, у які прыехалі беларускія артысты Варшавы, быў Кракаў.
Тут паказ спектаклю адбыўся ў новай беларускай прасторы ў старым горадзе.
Трэці горад, які прымаў «Купалінку», — Уроцлаў.
Пасля нядзельнай беларускамоўнай імшы ў касцёле спектакль паказалі для дыяспары беларусаў Уроцлава.
Публіка ў кожным горадзе розная. Гэта і эмігранты, і мясцовыя жыхары. Ва ўсіх свой жыццёвы досвед і ўяўленне пра мастацтва. Яны глядзелі адзін і той жа спектакль, але ў кожнай глядзельнай зале быў свой энергетычны пасыл для актораў. І здзіўленая публіка Беластоку, і супердалікатная ў Кракаве, і дружалюбная ва Уроцлаве, былі вельмі ўражаныя.
Яны апладзіравалі і, не саромеючыся, перадавалі рэжысёру Наталлі Локіць свае ўражанні, заўвагі і вельмі шмат радасці — ад беларускага мастацтва і ад асалоды роднай беларускай мовай.
Даслаць сваю навіну: @ex_presslive
Добро пожаловать в реальность!