Барысаўчанін Дзяніс Мандзік ужо некалькі год робіць рэп, а ў сакавіку скончыўся яго першы тур па Польшчы. Ён усім раіць слухаць больш беларускай музыкі: «Слухайце сваё. Тады ў нас з’явіцца індустрыя, і выканаўцы змогуць зарабляць творчасцю на жыццё больш якаснай і класнай музыкай і кантэнтам».
Дзяніс Мандзік — актывіст, былы кіраўнік «Моладзі БНФ». У 2020 годзе быў некалькі разоў затрыманы. З восені 2020-га жыве ў Польшчы.
«Былі такія, якія першы раз у жыцці на канцэрт трапілі, і я іх першы выканаўца»
— Адчуванні супермегафайныя, рады, што паехаў і вельмі моцна зарадзіўся энэргетыкай ад людзей, ад усяго, што адбывалася, ад сябе таксама.
Беларус падкрэслівае, што атрымаў вельмі-вельмі пазітыўныя ўражанні:
— Пазнаёміўся з вялікай колькасцю крутых людзей, паглядзеў, увогуле, хто слухае маю музыку, ад гэтага толькі цёплыя ўспаміны. Свае пэўныя задачы я выканаў, і ад гэтага задаволены. таксама задаволены публікай.
Дзяніс не ведаў, хто прыйдзе на канцэрт, для яго гэта было ўсё загадкава:
— Не ведаў, якія людзі будуць мяне слухаць, наколькі ў мяне атрымаецца іх расхістаць і разгайдаць. Усё было крута, у кожным горадзе былі вельмі прыемныя і пазітыўныя людзі.
Канцэрты атрымаліся вельмі розныя, але на кожным атрымалася зарадзіцца энэргіяй, зарадзіць іншых. Класна танчыць, аддавацца музыцы з душой. Рэперу за гэтым было прыемна назіраць:
— Ад гарадоў таксама толькі цёплыя ўраджанні. Спачатку быў хатні канцэрт у Познані, дзе я жыву. Мяне прыйшлі падтрымаць шмат маіх сяброў, а таксама было дастаткова незнаёмых, якіх я ўпершыню бачыў. Усе былі пад уражаннем. Напрыклад, былі такія, якія першы раз у жыцці на канцэрт трапілі, і я іх першы выканаўца. Калі б не публіка, калі б у кожным горадзе не было столькі людзей, якія дэнсілі, казалі шмат прыемных слоў пасля канцэрта, то безумоўна, не было б усіх гэтых цёплых уражанняў і ўспамінаў.
Па словах выканаўцы, такога было нямала: людзі падыходзілі, казалі шмат прыемных слоў, расказвалі цікавыя гісторыя, звязаныя з іх жыццём і яго творчасцю:
— Былі людзі, якія не ведалі мяне, але іх запрасілі сябры, ці яны неяк выпадкова патрапілі і аказаліся прыемна здзіўленымі і натхнёнымі пасля канцэртаў.
«Да мяне падышоў хлопчык і сказаў, што ён Дзёня, і таксама з Барысава»
Гэта быў першы тур рэпера, па яго словах, кожны горад атрымаўся па-свойму цікавым, усе гарады былі рознымі, і канцэрты там атрымаліся рознымі:
— Гэта таксама добры паказальнік таго, дзе якія людзі жывуць. У Познані быў хатні канцэрт, дзе было шмат сяброў. Там я хацеў максімальна зарадзіцца энэргіяй, не баяцца, перамагчы нейкі стрэс. У Познані моцна адрываліся, скакалі, там адбыўся першы слэм на маім канцэрце (але не апошні). Гэта ўсё дало мне ўпэўненасці ў сабе. Усё атрымалася, людзі мяне падтрымалі. Я моцна зарадзіўся, і з гэтай падзарадкай паехаў далей.
Наступны дзень ужо быў у Гданьску. Там атрымаўся па-свойму класны атмасферны канцэрт. Туды прыйшло шмат людзей:
— Гэта адзіны горад, дзе я не прадаваў квіткі, не ведаў, колькі прыйдзе людзей. Не было пэўных чаканняў. Калі выйшаў на сцэну, здзівіўся, бо людзей было шмат. Для першага канцэрта і для маладога артыста, амаль усе месцы былі занятыя. Больш за ўсё здзівілі людзі, якія прыйшлі. Завіталі з дзецьмі і сабакамі, людзі сярэдняга ўзросту. Усе такія прыгожыя і крэатыўныя. Там такі вайб асаблівы горада. Большасць сядзелі і насалоджваліся слухаць музыку, некаторыя выходзілі танчыць — і дзеці, і пёсікі.
Да такога рэпер не быў гатовы, але паверыў у сябе:
— Пасля людзі падыходзілі і дзяліліся ўражаннямі, давалі цікавыя парады. Моцна мяне падтрымалі, данацілі, набылі шмат мерча. Была адна дарослая жанчына, яна пад Drum and Bass выйшла і аджыгала. Прыемна назіраць, што незалежна ад узросту, музыка можа аб’ядноўваць людзей. Да мяне падышоў хлопчык і сказаў, што ён Дзёня, і таксама з Барысава. У эміграцыі я мала сустракаў людзей з Барысава, для мяне было прыемна земляка сустрэць і пачуць. А яшчэ адзін хлопец сказаў, што скончыў Медуніверсітэт фізіятэрапеўтам. Калі ў мяне будуць праблемы са спіной, то можна звяртацца да яго.
«Дзякуючы гэтай дзяўчыне адбыўся мой канцэрт, і я не пашкадаваў»
Далей была Варшава. Аказалася, што ў Варшаве на канцэрт прыйшло каля 70 чалавек:
— Для мяне як для пачаткоўца — гэта вялікая лічба. Было таксама шмат людзей, якія першы раз мяне чулі. Быў хлопец, у якога быў Дзень нараджэння. Яго зацягнулі сябры, ён крута адарваўся. Пад канец быў вялікі слэм. Людзі запальвалі ліхтарыкі пад некатоыря песні. Я сам не мог паверыць, што такое магчыма, што ўсё адбываецца на маім канцэрце. Некалькі дзён адыходзіў, не мог звязаць гэта з рэчаіснасцю, што гэта сапраўды адбылося.
Усе кацэрты для мяне, як дзеці, як першыя крокі, кожны — асаблівы. Атрымалася пастасавацца з крутымі людзьмі, з сябрамі, якіх даўно не бачыў.
Потым быў Уроцлаў у пачатку сакавіка. Па колькасці было менш за ўсіх чалавек. Але гэта быў самы высокі паказальнік па колькасці людзей, якія адначасова танчылі і адрываліся на танцплацы:
— Літаральна ўсе, хто былі на канцэрце, танчылі, я пазнаёміўся з крутымі людзьмі. Прынамсі, з Нікай, якая дапамагала гэта арганізаваць, яна правяла цудоўную экскурсію перад канцэртам па горадзе. І месца, дзе ўсё адбывалася, было ўтульнае і прыемнае.
Аказалася, што Дзяніс не збіраўся ехаць ва Уроцлаў:
— Мне напісала дзяўчына і сказала, што слухае маю музыку і хацела б прыйсці на канцэрт. Калі нават 1 чалавек мяне чакае, значыць варта рабіць. Дзякуючы гэтай дзяўчыне адбыўся мой канцэрт, і я не пашкадаваў.
«З’яўляецца шмат новых імёнаў, шмат новых людзей, якія робяць рэп па-беларуску»
На пытанне EX-PRESS.BY, у якім стане знаходзіцца беларускі рэп, Дзяніс адказвае наступнае:
— Калі параўноўваць з светавым поглядам на музыку, то агулам беларуская музыка знаходзіцца ў заняпадзе. Але калі паглыбляцца больш у кожны жанр і параўноўваць з тым, што было раней, ідзе пэўнае развіццё, і гэта тычыцца беларускага рэпу. З’яўляецца шмат новых імёнаў, шмат новых людзей, якія робяць рэп па-беларуску.
За гэтым вельмі прыемна сачыць, пры тым, што з’яўляюцца людзі, якія робяць рэп у розных жанрах. Хачу адзначыць Антона Туркова з Вільні, ён робіць хардхор-рэп пад псеўданімам Цмок. Гэта вельмі цікава, таму што раней нічога падобнага не было.
Таксама зычу звярнуць увагу на хлопца «Лайтовы». Я лічу яго на дадзены момант лепшым рэперам у гісторыі беларускага рэпу. Людзі зацікаўлены беларускім рэпам. Барысаўчанка Іва Саціва назбірала вялікую аўдыторыю. Калі глядзець на лічбы і фітбэн, яна паказальнік сярод маладых артыстаў, як трэба рабіць музыку і відэа прадакшн. Гэта дае выканаўцам імпульс, думаю, што далей будзе лепей. Пакуль ёсць людзі, якія будуць хадзіць на канцэрты і падтрымліваць нас, гэта ўсё будзе расці і развівацца. А мне падаецца, што такіх людзей становіцца ўсё болей і болей.
Напрыканцы размовы барысаўчанін пажадаў нашай аўдыторыі слухаць яго песні:
— Паслухайце мае песні, тым больш, што я вас зямляк, у мяне атрымлівацца набіраць аўдыторыю і рабіць файную музыку. Усім раю слухаць больш беларускай музыкі. Можна пачаць з песні «Сон» альбо «Маладосць».
Слухайце не толькі зорак беларускай музыкі, але і цікаўцеся чымсьці новым, адкрывайце маладых выканаўцаў, іх зараз вельмі шмат. Слухайце сваё. Тады ў нас з’явіцца індустрыя, і выканаўцы змогуць зарабляць творчасцю на жыццё больш якаснай і класнай музыкай і кантэнтам.
Падзяліцца меркаваннем: @ex_presslive
Добро пожаловать в реальность!