«Палітвязынка» запусціла калекцыю ўпрыгожанняў салідарнасці. EX-PRESS.LIVE даведаўся, чаму варта падтрымаць праект і беларускіх жанчын у зняволенні.
«Падчас паўстання Каліноўскага падтрымка палітзняволеных выяўлялася і ў модзе: жанчыны насілі жалобныя адзенні, з’явілася цэлая лінія ўпрыгожанняў»
— Знаёмая дызайнерка ўпрыгожанняў прапаноўвала зрабіць падобнае, — кажа стваральніца праекта «Палітвязынка» беларуска Яўгенія Доўгая. — Я думала, як гэта можна ажыццявіць. У Варшаве трапіла на выставу, прысвечаную паўстанню Кастуся Каліноўскага. Там паказвалі ўпрыгожанні, якія насілі ў падтрымку палітвязняў-паўстанцаў. Падчас паўстання падтрымка палітзняволеных выяўлялася і ў модзе: жанчыны ў падтрымку палітвязней насілі жалобныя адзенні, з’явілася цэлая лінія ўпрыгожанняў: бранзалеты з сэрцам і якарам, завушніцы, каралі, пярсцёнкі, брошкі.
«Завушніцы ў выглядзе цюльпанаў, а зашпількі ў іх як кайданкі»
— Я стала гугліць і знайшла класныя артыкулы журналіста Алеся Кіркевіча. Шмат пісаў пра гэта і гісторык Васіль Герасімчык. Так нарадзілася ідэя нашай калекцыі.
Пра асаблівасць упрыгожанняў дадае наступнае:
— Насамрэч, усё зроблена начамі і карпатліва. І калі прыгледзецца на некаторыя ўпрыгожанні (жамчужны чокер да прыкладу), там пацеры размешчаны так — азбукай Морзэ «Жыве Беларусь».
Звярніце, дарэчы, увагу на завушніцы. Яны ў выглядзе цюльпанаў, а зашпількі ў іх як кайданкі. Цюльпаны — гэта пра кветкі салідарнасці на жаночых акцыях.
Замовіць каралі, бранзалеты і завушніцы можна ўжо сёння і з любой кропкі свету. Усе атрыманыя сродкі пойдуць на падтрымку палітзняволеных беларусак.
Хочаце расказаць сваю гiсторыю? Пiшыце: @ex_presslive.
Добро пожаловать в реальность!