Выстава «Руіны Беларусі», якая адкрылася ў Берліне на мінулым тыдні, дазваляе зірнуць на спадчыну і страты Беларусі праз творчасць беларускага мастака Уладзіміра Грамовіча. Яго працы адлюстроўваюць як захаваныя аб’екты, так і руіны мінулага, якія сталі часткай сённяшняга досведу беларусаў.
Уладзімір Грамовіч — беларускі мастак у выгнанні, знаёмы чытачам EX-PRESS.BY па ўдзеле ў выставе «Часам я трымаюся за паветра».
У сваёй новай выставе Уладзімір Грамовіч даследуе палітычныя і архітэктурныя пераўтварэнні ў Беларусі.
Для стварэння экспазіцыі мастак выкарыстаў дакументальныя фотаздымкі, якія набылі новае жыццё праз асабістыя інтэрпрэтацыі і наратывы.
Цэнтральная тэма выставы — разбурэнні, якія абрынуліся на Беларусь падчас ваенных падзей, а таксама ігнараванне культурнай спадчыны ў пасляваенны перыяд. Грамовіч набыў на eBay рэдкія фотаздымкі беларускіх гарадоў часоў нямецкай акупацыі, якія сталі асновай для праекта «Руіны Беларусі».
Мастак стварыў своеасаблівы «міфічны этнаграфічны музей», спалучаючы артэфакты, аб’екты і фотаздымкі, каб крытычна пераасэнсаваць гісторыю і паказаць альтэрнатыўны погляд на звыклыя гегеманічныя наратывы.
Выстава будзе працаваць у Берліне да 28 лістапада.
Пасля завяршэння выставы ў Берліне фотаздымкі стануць часткай архіва VEHA — адкрытай платформы, якая захоўвае візуальную спадчыну Беларусі і дае шырокай аўдыторыі магчымасць адкрыць забытыя і прыглушаныя старонкі гісторыі краіны.
Даслаць навіну: @ex_presslive
Добро пожаловать в реальность!