У дзень годнасці ва Уроцлаве адкрылася выстава Вольгі Якубоўскай «Беларусы-коцікі». Яшчэ амаль тры тыдні, да 9 верасня, яе можна пабачыць у самым цэнтры горада.
Свае карціны Вольга прысвячае падзеям і героям нашага часу. Такім, як Ніна Багінская, Марыя Калеснікава, Раман Бандарэнка, Паліна Шарэнда-Панасюк, Сяргей Чалы і многім іншым. Героі яе прац напісаны нібы для дзяцей — гэта коцікі і ваўкі, ёсць і сабака, але сюжэты — аб тым, што зараз адбываецца ў Беларусі.
Выстава знаходзіцца па адрасе: ul. Świdnicka да ul. Kazimierza Wielkiego.
Арганізатары дзякуюць усім, хто прыняў удзел у дабрачынным марафоне, валанцёрам і ўсім неабыякавым людзям:
— Шчыры дзякуй уcім, хто далучыўся і ладзіў гэта адкрыццё, асабліва нашым валанцёрам! Цяпер кожны жыхар і турыст Уроцлава зможа крыху больш даведацца пра Беларусь і беларусаў.
EX-PRESS.BY шмат пісаў пра працы мастачкі Вольгі Якубоўскай. У 2021 годзе яна натхнілася гісторыяй «берлінскай Багінскай» з Жодзіна. Цыкл прац пра беларускіх «коцікаў» папоўніўся карцінай «Жанчына-сцяг», прысвечанай Ліне Габт з Берліна. У жніўні 2020 года Ліна была настолькі ўзрушана падзеямі, якія адбываюцца ў роднай Беларусі, што вырашыла сваёй знешнасцю расказваць пра краіну і пафарбавала валасы ў бчб-колеры.
Мастачка таксама прысвяціла сваю карціну «Памідоры са смятанай» Анатолю Шаўковічу, якому, даўшы 15 сутак «за выраб у падвале пратэстнай сімволікі», улады накінулі яшчэ 15 сутак.
Сам Анатоль стаў яшчэ адным добрым героем для многіх. У «кадыраўскім відэа» сівы мужчына з добрай усмешкай растлумачыў, чаму яму падабаецца спалучэнне белага і чырвонага колеру: «жонка рыжанькая», ды і памідоры са смятанай яму заўсёды падабаліся.
Мастачка прысвяціла сваю карціну «Дзеці не павінны знаходзіцца за кратамі!» непаўналетняму палітвязню Мікіце Залатарову ў 2021 годзе.
Мікіта быў збіты пасля затрымання і патрапіў у рэанімацыю. Віны сваёй не прызнаў. У 2024 годзе ў Беларусі супраць 20-гадовага асуджанага Мікіты Залатарова распачалі новую справу — аб непадпарадкаванні адміністрацыі турмы. Яму могуць дадаць яшчэ 2 гады калоніі.
@expressby Ва Уроцлаве працуе выстава Вольгі Якубоўскай «Беларусы-коцікі». Героі яе прац напісаны нібы для дзяцей, але сюжэты — аб тым, што адбываецца ў Беларусі. #беларусывпольше #беларусывроцлав #котики #беларусыкоцікі #expressby ♬ Rockin - Chris Alan Lee
Даслаць навіну: @ex_presslive
Добро пожаловать в реальность!