У апошнія выходныя жніўня ва Уроцлаве адбыўся фэст SKOVORODA FEST, прысвечаны Дню Незалежнасці Украіны. Беларуску Ганну ўразілі цікавыя ініцыятывы і людзі, якія натхняюць.
Па словах беларускі, гэта мультыкультурны фэст, арганізаваны ва Уроцлаве з нагоды святкавання Дня Незалежнасці Украіны:
— У праграме былі забавы і майстар-класы для дзяцей і дарослых, кірмаш рамёстваў і фудкорт. Дарэчы, на станцыі Суполкі беларусаў Уроцлава гатавалі вельмі смачныя дранікі. Было арганізавала шмат дабрачынных акцый, латэрэй, было кола фартуны, віктарыны.
Беларуска падкрэслівае:
— Асабліва мяне захапіла дабрачынная акцыя ў падтрымку ўкраінскіх ваяроў на вайне. Можна было ахвяраваць грошы і напісаць словы ўдачы і падтрымкі на машыне, якая адправіцца на фронт. У валанцёрскай зоне плялі ахоўныя сеткі, стваралі дроны і ўпакоўвалі харчовыя наборы ў межах праекту «Пакет дапамогі UA». Збіралі банкі для свечак.
Ганна трапіла ў гарадок НДА (недзяржаўных арганізацый):
— На тэрыторыі фестывалю быў створаны гарадок НДА, дзе свае стэнды прадставілі некамерцыйныя арганізацыі, якія займаюцца падтрымкай мультыкультуралізму, інтэграцыі і дапамогі. Асабліва цікава было беларусам каля нашай Суполкі. Можна было набыць цішоткі, упрыгожанні, дранікі, ахвяраваць грошы на шэлтар для былых палітвязняў.
Гэта выдатная магчымасць адкрыць для сябе цікавыя ініцыятывы, сустрэць людзей, якія натхняюць, і даведацца больш пра іх працу. Магчыма, далучыцца.
Усіх наведвальнікаў чакаў мультыкультурны гастранамічны кірмаш. Гэта добрая магчымасць адкрыць для сябе густы Украіны, Польшчы, Беларусі, Турцыі, Грузіі, Сірыі, Індыі і Калумбіі. Кожны стэнд прапаноўваў традыцыйныя стравы свайго рэгіёну, можна было адкрыць для сябе кулінарную разнастайнасць гэтых краін.
Таксама адбыўся музычны канцэрт у клубе Łącznik. Выступалі ганаровыя госці, гурт «IЗ DNIPRA», гурт «Вимираючі Види», гурт «Квіт».
Хочаце даслаць навіну? Мы на сувязі: @ex_presslive
Добро пожаловать в реальность!