Апытанка, якую EX-PRESS.BY правёў перад новым навучальным годам натхніла беларуску Ганну ў Польшчы падлічыць свае расходы да школы. Яны немалыя, але ў Польшчы дзецям даюць на падрыхтоўку да школы 300 злотых (247 рублёў). У Беларусі дапамогу могуць атрымаць толькі шматдзетныя сем’і: 125,62 рубля на кожнага школьніка. Гэта 30% ад бюджэту пражытачнага мінімуму.
«Гэты год у нас не бюджэтны»
Ганна жыве ў Польшчы два гады, яе дачка ўжо адаптавалася, добра размаўляе па-польску, вучоба ёй падабаецца:
— Дачка вучыцца ў пачатковай школе. Ёй усё вельмі падабаецца. У Польшчы ўсім школьнікам, хто знаходзіцца легальна на тэрыторыі краіны, даюць на падрыхтоўку да школы 300 злотых (247 рублёў)*. Гэта сістэма працуе штогод.
Раней дзецям у 4-м класе выдавалі ноўтбукі, але гэту праграму пакуль прыпынілі.
— Я ўжо амаль усе грошы, што далі да школы, патраціла, — распавядае Ганна. — 219 злотых (180 рублёў) ужо дакладна няма (а можа і болей): закупіла «канцэлярку» (альбомы, сшыткі, папера, тэчкі для працы ў школе, алоўкі, лінейкі і гэтак далей).
Набыла пенал за 70 злотых (57, 7 рублёў). Дачка вельмі хацела менавіта яго. Можна было і за 20-30 (16-25 рублёў) набыць, але якасць была б пад пытаннем.
Маці набыла адмысловы абутак (у школу трэба зручныя боты). Спачатку знайшла за 80 злотых (66 рублёў), не спяшалася і амаль такія ж набыла за 20 злотых (16 рублёў).
Заплечнік забралі за 20 (16 рублёў), але ён неякасны, па меркаванню Ганны. Нармальны каштуе каля 120-170 злотых (100-140 рублёў).
Набылі новыя нагавіцы: за 2 штукі 15 злотых (12 рублёў), цішоткі: па 10-15 злотых (8-12 рублёў). За прыгожы і якасны ланч-бокс аддала 24 злотых (20 рублёў). Тэрма-бутэлька для вады (таксама можна гарачае какава ці гарбату наліваць) каштавала 80 злотых (66 рублёў):
— Так што гэты год у нас не бюджэтны. Грошы, што засталіся, пойдуць на заплечнік, які неўзабаве парвецца, хаця дзіцёнку вельмі падабаецца. Так што каля 100 злотых яшчэ спатрэбіцца. Плюс на працягу школы будзем набываць тое, што скажуць выкладчыкі. Зараз, напрыклад, сказалі набыць прыгоды сшытак А4 для ангельскай мовы на 2 гады. Стары заплечнік, дарэчы, мы аддалі іншай дзяўчынцы. Плюс мы не набывалі белы верх, бо блузка ў нас была.
Пра мінулы год жанчына ўзгадвае:
— Памятаю, што ў першы клас былі закупы меней: там я аддала на «канцэлярку» меней 75 злотых (62 рубля) дакладна. Заплечнік нам падарылі. Але ён быў вельмі якасны і каштаваў болей 100 злотых.
«300 рублёў — сярэдні чэк на закупы да школы»
Беларуска шчыра здзіўляецца, калі чуе, што ўсё ў Польшчы амаль бясплатна:
— Калі кажуць, што нічога не набываюць у Польшчы да школы, я не веру, бо ў школу трэба і заплечнік, і «канцэлярка», і абутак, і ланч-бокс, і бутэлька для вады. Усе дзеці гэта маюць. Нехта яшчэ і на абеды ходзіць. А гэта бясплатна ніхто не дае.
Апытала сваіх знаёмых матуль: усе, як адна, кажуць, што прыкладна сума атрымалася ў межах 300 злотых. Тая ж сітуацыя ў матуль у Беларусі: ніхто больш 300 рублёў не аддаў на дзіця. Думаю, гэта якраз і ёсць сярэдні чэк на закупы да школы.
Па словах гераіні, сшыткі ўсе мусяць быць новыя, алоўкі простыя і каляровыя, фарбы, пластылін і гэтак далей:
— Яшчэ на падручнікі трэба вокладкі, каб яны не сапсаваліся, бо іх перадаюць наступным класам. Звычайна такіх два-тры. У асноўным дзеці працуюць у сшытках-падручніках памерам А4, яны каляровыя, прыгожыя, зручныя. Застаюцца потым дзецям. Іх закупае школа, дзецям даюць бясплатна.
За падручнікі дзеці плацяць напрыканцы года толькі ў тым выпадку, калі згубілі. Гэты кошт звычайна 10-15 злотых (8-12 рублёў). У Беларусі за падручнікі ў гэтым годзе трэба заплаціць 20 рублёў.
— Я ведаю, што ў некаторых школах арганізуюць бясплатны вандроўкі, але ў нашай школе мы плацім каля 50-150 злотых (40-125 рублёў) за паездкі на аўтобусе амаль на цэлы дзень. Перакус і ваду збіраем у ланч-бокс, — распавядае Ганна.
*EX-PRESS.BY выкарыстаў канвэртар, дзе за 1 польскі злоты даюць 82 капейкі, за 5 злотых — 4,1 рублі.
Жадаеце падзяліцца меркаваннем? Пішыце: @ex_presslive
Добро пожаловать в реальность!