Беларуска Ганна жыве ў Польшчы. Карту побыту (дакумент, які пацвярджае статус замежніка і дазваляе знаходзіцца на тэрыторыі Польшчы больш за 90 дзён) яна атрымала год таму, але ў адзін момант зразумела, што страціла яе. Спачатку спужалася, потым звярнулася да юрыстак суполкі «Партызанка», дзе ёй падказалі абавязкова падаць заяву і замяніць карту.
— Карта побыту — гэта вельмі важны дакумент, — кажа дзяўчына. — Яна трэба, каб пацвердзіць наяўнасць і прававы статус чалавека знаходжання ў Польшчы. Пластык змяшчае самую важную інфармацыю: дату нараджэння, колер вачэй, ID-нумар (PESEL), імёны таты і маці, краіну нараджэння і фотаздымак. Вы павінны, па-першае, паведаміць, што дакумент згублены, каб яго анулявалі, па-другое, абавязкова зрабіць новы.
Што рабіць, калі страцілі дакумент
Беларуска кажа:
— Як толькі заўважылі знікненне карты побыту, трэба звярнуцца ў мясцовую адміністрацыю цягам 3-х дзён. Вельмі важна: трэба звяртацца ва ўжонд (у Беларусі гэта выканкам), дзе атрымалі страчаны дакумент. У маім выпадку трэба было ехаць у іншае ваяводства 5 гадзін на цягніку, калі б я падавала заяву асабіста, можна таксама скарыстацца поштай, даслаўшы ліст з апавяшчэннем аб уручэнні.
Законам вызначаны тэрміны: на працягу 14 дзён падаць заяву аб аднаўленні карты побыту.
Якія дакументы неабходны для аднаўлення карты побыту
Акрамя заявы аб страце дакументу, трэба падаць наступнае:
— запоўненую форму хадайніцтва аб замене карты і 2 фотаздымкі памерам 35*45 мм. Плюс квітанцыю аб аплаце паслугі.
У розных ужондах можа быць розны спіс дакументаў. Напрыклад, трэба будзе раздрукаваць копіі ўсіх запоўненых старонак пашпарта або копію і арыгінал «zaświadczenie o zameldowaniu» (рэгістрацыі, выдача гэтай даведкі зараз каштуе 17 злотых).
Калі ўстанова паведаміць аб адсутнасці пэўных дакументаў, то ў заяўніка ёсць сем дзён, каб іх прадставіць.
Ганна дадае, што трэба захаваць даведку, якую пасля падачы заявы і дакументаў ужонд выдасць замежніку:
— Гэты дакумент пацвярджае легальнае знаходжанне асобы ў Польшчы. Ён дзейнічае да дня атрымання новай карты побыту, але не даўжэй за два месяцы.
Беларуска кажа:
— Пераафармленне карты платнае. Калі ўпершыню звяртацца з такой заявай, кошт паслугі складзе 200 злотых. Калі вы страцілі карту ў другі раз, то кошт узрастае да 300 злотых. Ёсць ільгота 50% у аплаце, калі чалавек знаходзіцца ў цяжкім фінансавым стане; мэта знаходжання звязана з вучобай у сярэдняй школе ці каледжы на тэрыторыі Польшчы; дзецям да 16 гадоў.
Напрыканцы суразмоўца дадае:
— Не губляйце свае дакументы, асабліва калі вы не можаце вярнуцца ў Беларусь. Пашпарты, пасведчанні аб нараджэнні, адукацыі, страхоўкі, карты побыту — гэта ўсё вельмі важныя дакументы. Беражыце іх.
Жадаеце падзяліцца меркаваннем? Пішыце: @ex_presslive
Добро пожаловать в реальность!