У розных гарадах і краінах беларусы далучыліся да святкавання Дня годнасці. Эмігранты выходзілі ў цэнтры гарадоў, праходзілі маршамі па вуліцах, нават пад дажджом. За 4 гады рэпрэсіі ў Беларусі не спыніліся, улада працягвае гвалт і ціск. Суполкі беларусаў замежжа памятаюць пра 2020 год і выходзяць на вуліцы.
«Stop the dictator in Belarus»
Вашынгтон, ЗША
Дыяспара арганізавала інфармацыйныя стэнды для мінакоў. Дзякуючы прывабнай інфаграфіцы і плакатам, можна прачытаць і зразумець, у якіх умовах зараз знаходзяцца палітычныя вязні і ўвогуле жыхары краіны. Удзельнікі акцыі заклікалі заставацца з Беларуссю і падтрымліваць барацьбу супраць дыктатуры.
Кёльн, Нямеччына
Адбылася акцыя беларусаў Паўночнага Рэйна Вестфаліі з нагоды чацвёртай гадавіны беларускіх пратэстаў.
Берлін, Нямеччына
У Берліне каля амбасады Вольнай і Дэмакратычнай Беларусі (арт-праект) прайшла чарговая акцыя ў гонар вядомых беларусаў з нагоды іх дзён народзінаў.
Італія
У Італіі таксама не забылі падзеі 2020 года. Арганізатары адзначылі:
— Дзякуем усім, хто далучыўся да мітынгу ў гонар Дня Годнасці ў Беларусі! Асабліва ўдзячныя сябрам з Украіны, прафсаюзам Cisl Firenze Prato, асацыяцыі BelarusBo, чальцам асацыяцыі «Талака» за падтрымку і салідарнасць. Вось ужо 4 гады мы разам змагаемся супраць дыктатуры. Мы ніколі не забудзем і не даруем гвалт у дачыненні да беларусаў. Мы памятаем пра нашых палітвязняў і працягваем барацьбу за іх свабоду, за нашае права вярнуцца дадому. Дзякуем усім неабыякавым за актыўнасць. Разам мы больш моцныя, і разам абавязкова прыйдзем да перамогі!
«Мы абавязкова вернемся ў бяспечную і дэмакратычную Беларусь»
Варшава, Польшча
У Варшаве адбылася акцыя беларускай дыяспары з нагоды чацвёртай гадавіны прэзідэнцкіх выбараў і беларускіх пратэстаў 2020 года. Моцным і вялікім маршам прайшліся па вуліцах польскай сталіцы беларусы, якія памятаюць, што адбылося 4 гады таму, як працягваюць катаваць у беларускіх турмах.
Уроцлаў, Польшча
Беларусы Уроцлава адзначылі чацвёртую гадавіну пратэстаў 2020 году. Традыцыйнае шэсце праз цэнтр горада скончылася ля гістарычнага месца Pregierz — слупа, дзе ў старажытнасці выконваліся смяротныя пакаранні.
Гэтым разам да слупа быў прыкаваны беларускі дыктатар, які лічыцца злачынцам ва ўсім свеце. Вось, што кажуць беларусы, якія ўдзельнічалі ў маршы, а потым далучыліся да акцыі памяці:
— Мы бачылі вольных беларусаў. Была вельмі моцная прамова ад беларуса, правільна казаў: «Хто будзе рабіць, як не мы». Калі ёсць магчымасць (а ў нас яна ёсць), трэба абавязкова яе выкарыстоўваць і падтрымліваць такія падзеі.
*****
— На жаль, за 4 гады рэпрэсіі не спыніліся, улада працягвае гвалт і ціск на грамадзян. Усё больш з'яўляецца эмігрантаў, але, нягледзячы на гэта, супольнасці беларусаў замежжа выходзяць на вуліцы і памятаюць пра тое, што мы павінны вярнуць сабе краіну, калі-небудзь мы абавязкова вернемся ў бяспечную і дэмакратычную Беларусь.
*****
— Я выходжу на маршы, наведваю беларускія імпрэзы, падтрымліваю беларускі бізнэс за мяжой, таму што так я адчуваю еднасць з іншымі беларусамі, я ведаю, што і мне, і шмат каму трэба гэтая падтрымка. Нават проста сустрэцца на маршы і абняць адзін аднаго. Мы не забылі 2020 год, мы выходзім на вуліцы, мы пішам лісты палітвязням, мы верым у перамогу. Абавязкова надыйдзе гэты дзень, няхай і прыйдзецца чакаць не адзін год. А пакуль у нашых сілах трымацца разам і памятаць пра ахвяры, якія прынёс народ Беларусі.
Кракаў, Польшча
Акцыя адбылася і ў Кракаве, дзе таксама вельмі моцная дыяспара беларусаў і беларусак. Удзельнікі прайшліся маршам па горадзе, гучна крычалі «Жыве Беларусь», прыцягвалі ўвагу да пытання, дзе зараз нашы палітвязні.
Быдгошч, Польшча
Беларусы сабраліся ў цэнтры Быдгошчы, каб узгадаць пачатак Беларускай рэвалюцыі, што адбыўся 4 гады таму, і расказаць мінакам пра тое, што адбываецца ў нашай краіне зараз.
Беласток, Польшча
У самым блізкім да Беларусі польскім горадзе дыяспара выйшла на акцыю памяці і салідарнасці, гучна казалі пра праблемы краіны, дыктатуру і патрабавалі «Свабоду палітвязням».
Торунь, Польшча
У Торуні беларусы, нягледзячы на дождж, выйшлі з вялікім сцягам на марш і правялі акцыю салідарнасці з беларускімі палітвязнямі і ахвярамі рэжыму.
«Наша барацьба працягваецца»
Тбілісі, Грузія
У грузінскай сталіцы таксама адбыўся мітынг. Аргінізатары адзначыліі:
— 9 і 10 жніўня па ўсім свеце беларусы замежжа выйшлі на вуліцы сваіх гарадоў, каб нагадаць усім, што наша барацьба працягваецца, каб людзі ў Беларусі, якія не маюць магчымасці выйсці і казаць праўду аб злачынствах рэжыму Лукашенкі, бачылі і ведалі, што мы працягваем намагацца надыходу лепшага часу дзеля нашай краіны і яе жыхароў.
Батумі, Грузія
Таксама беларусы выйшлі на мітынг супраць дыктатуры Лукашэнкі ў грузінскім горадзе Батумі. Яны нагадалі, чаму беларусы выйшлі на пратэсты ў 2020 годзе. Да акцыі далучыліся і ўкраінскія сябры.
Клайпеда, Літва
Беларусы ў марскім горадзе ва ўгодкі скрадзеных выбараў выйшлі на акцыю. Пакуль удзельнікі акцыі дзяліліся асабістымі перажываннямі падчас пратэстаў у жніўні 2020, мінакі падыходзілі да інфармацыйнага стэнда з кароткай гісторыяй усталявання дыктатуры ў постсавецкай Беларусі, якая была напісаная на беларускай і літвінскай мовах.
Візуалізацыяй значэння гэтага дня для беларусаў стаў банер: «Дзень, які нас яб'яднаў, але разлучыў з Радзімай».
Рыга, Латвія
Беларусы Латвіі сабраліся ў Рызе на Плошчы Латышскіх Стралкоў, ля Музея акупацыі і сцяны-мемарыяла, прысвечанай ахвярам сталінскага тэрору «Дотык да гісторыі» з нагоды чацвёртай гадавіны пачатку пратэстаў пасля сфальсікаваных выбараў прэзыдэнта Беларусі, каб ушанаваць памяць загінулых у жорнах Лукашэнкаўскай дыктатуры. Удзельнікі ўдзячныя Рыжскай думе, Музею акупацыі, Supolka беларусаў Латвіі за арганізацыю мерапрыемства.
Масква, Расія
Беларусы Масквы таксама далучыліся да Міжнароднай акцыі беларускай дыяспары «Дзень годнасці».
Даслаць навіну: @ex_presslive
Добро пожаловать в реальность!