21 траўня — дзень палітычных вязняў, а таксама гадавіна смерці палітзняволенага Вітольда Ашурка. Па ўсім свеце беларусы выйшлі на акцыі падтрымкі і салідарнасці з палітвязнямі Беларусі.
Нямеччына
Амбасада вольнай і дэмакратычнай Беларусі ў Берліне (арт-праект) далучылася да Дня салідарнасці з палітвязнямі Беларусі. Арганізатары падкрэслілі, што антыбеларускі акупацыйны рэжым сёння катуе, забівае ў турмах і калоніях лепшых прадстаўнікоў нашай Бацькаўшчыны і намагаецца знішчыць усю беларускую эліту.
Бельгія
Беларусы Бельгіі, насуперак усім пагрозам рэжыму, выйшлі на акцыю, каб нагадаць пра лёс нашых палітычных вязняў і выказаць падтрымку тым, хто знаходзіцца за кратамі праз прагу лепшай долі для беларускага народу. Пасля акцыі, ужо традыцыйна, у Місіі дэмакратычнай Беларусі ў Бруселі яны напісалі паштоўкі тым палітвязням, якія святкуюць свой дзень народзінаў у траўні, і тым, пра каго няма ніякай інфармацыі ўжо трывалы час. У акцыі ўзяў удзел і намеснік прадстаўніка ў замежных справах Кабінета, кіраўнік Місіі дэмакратычнай Беларусі ў Бруселі Уладзімір Астапенка.
Яны распавялі еўрапейскаму грамадству пра тое, што ў Беларусі вялікая колькасць палітвязняў, як парушаюцца іх правы, якія праблемы са здароўем, што няма ніякай інфармацыі пра вязняў і ім не перадаюць лісты і перадачы.
Італія
Беларуская дыяспара ў Італіі правяла мітынг у Рыме, прысвечаны Дню палітвязня. На мерапрыемстве, арганізаваным Народнай амбасадай Беларусі ў Італіі, таксама прысутнічалі палітычныя дзеячы з партый «Fratelli d’Italia», «Partito democratico», «Più Europa», кандыдатка ў Еўрапарламент беларуска Вольга Сурынава.
«Разам з нашымі паплечнікамі мы распавялі гісторыі беларускіх палітвязняў і яшчэ раз нагадалі пра нашую барацьбу», — паведаміла прадстаўніца Народнай амбасады Беларусі ў Італіі Юлія Юхно. Таксама беларусы далучыліся да мітынгу сяброў з Сакартвэла. Юлія заклікала да аб'яднання намаганняў, узаемнай салідарнасці і падтрымкі адно аднаго. Бо зло ў нас агульнае: гэта пуцінская Расея.
У Форуме імя Нельсана Мандэлы адбыўся арт-перфоманс, прысвечаны Дню палітвязня ў Беларусі. У ім бралі ўдзел былыя палітзняволеныя Ася Булыбенка і Віталь Жук. Каля інсталяцыі клеткі, у якой 18 год правёў Нэльсан Мандэла, прайшла чытка лістоў палітзняволеных: Марфы Рабковай, Дзяніса Івашына, Эдуарда Бабарыкі, Паліны Шарэнды-Панасюк і іншых. Перфоманс скончыўся песняй «Чакай» Лявона Вольскага, пад якую былыя палітзняволеныя ў кайданах прайшлі ў клетку.
Францыя
З нагоды Дня Салідарнасці з палітвязнямі беларусы Ансі зладзілі фотавыставу беларускіх фотажурналістаў у ліцэі Бодэлер, а таксама правялі сустрэчы са старэйшымі вучнямі, дзе распавялі пра наш дэмакратычны рух, рэпрэсіі, палітвязняў, дабраахвотнікаў ва Украіне, рэйкавых партызанаў, салідарнасць беларусаў ды ўзгадалі нашых загінуўшых палітвязняў.
Швецыя
Беларуская лідарка Святлана Ціханоўская сустрэлася з беларусамі Швецыі. Перад дыялогам з дыяспарай і ўдзелам у акцыі салідарнасці з палітзняволенымі яна выступіла з эмацыйнай прамовай. Падзялілася тым, як перажывае асабісты боль, а таксама заклікала надалей працаваць для вызвалення палітвязняў.
«Я не ведаю дакладна, што адчуваюць тыя, хто за кратамі, але мне здаецца, што ў ізаляцыі самы вялікі страх — гэта страх быць забытым, — кажа Святлана. — І менавіта рэжым на гэта разлічвае. Бо калі ты адчуваеш падтрымку і салідарнасць – гэта дае сілы змагацца. Ты ведаеш, што твае пакуты недарэмныя, што справа, для якой ты ахвяраваў свабодай, — жыве».
Літва
21 траўня, у дзень салідарнасці з палітвязнямі, беларусы Вільні правялі незвычайны перфоманс, пад час якога АМАП брутальна затрымліваў дзяўчат.
У Клайпедзе адбыўся роварны прабег і акцыя ў падтрымку палітзняволеных. Удзельнікі казалі:
— Мы верым, што неўзабаве ўсе беларусы змогуць катацца на роварах, дзе захочуць, асабліва тыя, каму пасля гадоў у нечалавечых умовах беларускіх турмах трэба будзе аднаўляць здароўе.
Польшча
У скверы Вольнай Беларусі ў Беластоку адбылася акцыя з нагоды Дня Беларускіх палітзняволенных і гадавіны забойства Вітольда Ашурка. Як слушна было сказана на акцыі, — у Беларусі ідзе вайна:
— Ёсць забітыя, закатаваныя, параненыя, ёсць закладнікі, ёсць моцна траўматызаваныя. У гэтай вайне на нашам баку Святло, Праўда, Справядлівасць, Жаданне лепшага для Радзімы, памкненне ў будучыню. Той бок у якасці зброі выкарыстоўвае цемру, жах, нянавісць і боль, цягне краіну ў мінулае. Вызваленне палітвязняў — закладнікаў рэжыму, — наша агульная мэта, дзеля якой КОЖНЫ павінен рабіць тое, што ў яго сілах.
Мы працягнем барацьбу, пакуль усё не будуць вольныя! Свабоду палітвязням! МЫ — ГОЛАС БЕЛАРУСКІХ ПАЛІТВЯЗНЯЎ! Нам не ўсё адно! Беларусь! Вечная памяць забітым і закатаваных рэжымам Лукашэнкі палітвязняў: Вітольду Ашурку, Алесю Пушкіну, Мікалаю Клімовічу, Вадзіму Храсько, Ігару Ледніку, Аляксандру Кулінічу.
Посмотреть эту публикацию в Instagram
У цэнтры Уроцлава адбылася акцыя салідарнасці ў падтрымку палітзняволеных Беларусі. Удзельнікі выказалі сваю салідарнасць з тымі, хто знаходзіцца за кратамі за свае погляды і барацьбу за волю і незалежнасць Беларусі. Яны падкрэслілі, што не маюць намеру спыняцца і будуць выходзіць на вуліцы да таго часу, пакуль усе палітвязні не будуць вызвалены:
— Наша салідарнасць і прыцягванне ўвагі міжнароднай супольнасці будуць прыносіць плады. Сумесныя зусіллі дапамогуць у тым, што ўсе несправядліва асуджаныя будуць свабоднымі. Свабоду кожнаму палітвязню Беларусі. Памяць пра тых, хто загінуў! Жыве Беларусь!
Грузія
На плошчы Еўропы ў грузінскім Батумі адбылася акцыя да Дня палітвязня, дня, калі ў 2021 годзе ў калоніі загінуў Вітольд Ашурак. Актывісты на акцыі трымалі плакаты, на якіх была інфармацыя пра загінулых у лукашэнкаўскіх турмах, пра колькасць палітвязняў у Беларусі, пра невылечна хворых, якія могуць у любы момант памерці.
Даслаць навіну: @ex_presslive
Добро пожаловать в реальность!