У суботу, 25 траўня, адбудзецца дабрачынны канцэрт у падтрымку шэлтара для палітвязняў. На сцэне ў парку Skowroni ва Уроцлаве зайграюць Pomodor/off, ZNAK STOP, Вячэслаў Кміт, Даніла Вашкевіч, Навошта. Гасцей таксама чакае БЧБ-стэндап ад Банцэра.
Скарыстайцеся выдатным шанцам дадаць трошкі святла ў жыццё іншых ды атрымаць асалоду ад чароўнай жывой музыкі пад адкрытым небам з 14:00 да 22:00.
У праграме:
* дранікі і напоі за данаты;
* вядомыя музычныя выканаўцы;
* беларускія ўсім вядомыя песні;
* забавы;
* размовы па душах.
Як распавялі арганізатары, канцэрт быў нават пад пагрозай зрыву:
— Але ўсё выратавана. Запусцілася піяр-кампанія, пра падзею ведае ўжо дастаткова вялікая колькасць. Вакол шмат зацікаўленых прыняць удзел. Гэта будзе акустычны канцэрт, дзе будуць граць розныя гурты, у тым ліку вулічныя музыкі. Гэта пляцоўка, дзе могуць выступіць розныя ініцыятывы і гурты. Адбіраліся ўсе па крытэры, хто жадае. Ёсць хэдлайнеры, але чакаць, што гэта будзе фэст па тыпе октоберфэсту, натуральна не варта. Гэта маленькі канцэрт з гітарай на палянцы, з кірмашом і грылем. Акрамя музычнай імпрэзы вас таксама чакае кірмаш, дзе кожная пакупка стане звяном у ланцугу дапамогі палітвязням, напаўняючы іх дні надзеяй, дзякуючы вашай падтрымцы!
Уваход бясплатны. Але шчодрасць вітаецца.
— Прыходзьце і дапамагайце рабіць супольную справу агульнымі намаганнямі. Разам мы — сіла! — кажуць арганізатары.
Нагадаем, у сакавіку суполка беларусаў Уроцлава аб’явіла аб адкрыцці шэлтара для палітычных зняволеных і іх сем'яў, якія ўцяклі ад пераследу ў Беларусі.
Шэлтар створаны і аплочваецца ініцыятывай By_help. Рэгіянальным партнёрам па рэалізацыі працы шэлтара з'яўляецца БАП (Беларуская асацыяцыя палітычных вязняў) «Да Волі» і Суполка Беларусаў Уроцлава, якая забяспечвае фінансавую празрыстасць збору і дапамогу ў рэалізацыі. Шэлтар размешчаны ў горадзе Уроцлаў і носіць назву «Уроцлаў-сіці».
Даслаць навіну: @ex_presslive
Добро пожаловать в реальность!