«Юрык Дудзь ў людзі вывеў». Аляксандра Ханевіч на канале «ПОЛ ПЕРВОГО» распавяла, як ёй жывецца ў эміграцыі

У студыю да шпіца на шоў «ПОЛ ПЕРВОГО» завітала Аляксандра Ханевіч, самая знакамітая беларуская пенсіянерка, якая пакінула Радзіму і зараз жыве ў Беластоку.

Шпіцу загадалі знайсці пенсіянерку ў Польшчы. А дзе ж яе шукаць? У інтэрнэце! Там сабака і знайшоў Аляксандру Ханевіч і запрасіў да сябе ў студыю.

Госця распавяла Чумке, як яе «Юрык Дудзь ў людзі вывеў», чаму ёй не сядзіцца на беларускай пенсіі, а таксама — чаму Беларусі, па яе меркаванню, не дагнаць Польшчу яшчэ гадоў 30.

Жанчына акцэнтуе, што ніколі нічога кепскага пра Беларусь не казала:

— Але пра ўладу кажу, што дэмакратыі няма. Нам цяпер не дагнаць, мой каханы пёсік, Польшчу гадоў 30. Ворагамі сябе аблажылі з усіх бакоў, так і будзеце жыць.

На што шпіц адказвае аптымістычна:

— Будзем жывы, не памрэм!

На пытанне, ці добрыя зніжкі ў польскіх крамах, задаволена адказвае:

— Добрыя. Я ўсё бяру на зніжках. Грошай хапае, але на чорны дзень адкладваю. Каб ты ведаў, шампанскае даўно стаіць у шафе.

Распавяла госця, і як сала соліць:

— Солі ўзяла і насыпала. Солі тут хапае, няхай бацька не хвалюецца. Тры гады жыву ў Польшчы, і яшчэ ні разу не было, каб чагосьці не хапала: хлеба, солі. Нідзе чаргі не было.

На пачатку эміграцыі Аляксандра працавала ў клінінгу:

— Калі прыехала ў Беласток,прыбіралася ў пяці дамах. Раскажы там таксама, што тут ёсць спецыяльныя прыстасаванні, каб унітазы мыць. Не трэба галавой ва ўнітаз!

Пенсіянерка ганарыцца тым, што сядзела ў турме:

— Ганаруся, а што ж рабіць. Адразу ўсе знаёмыя сталі.

Чаго не хапае пенсіянерам у Беларусі?

— Не сядзелася мне ад таго, што праўды там не чула. Пенсіі не ва ўсіх добрыя. А людзі хварэюць у такім узросце. Лекі трэба. У Польшчы ў 70 гадоў у грамадскім транспарце ездзяць бясплатна. А ў Беларусі і ў 80 ездзяць за поўныя квіткі.

Напрыканцы Аляксандра Ханевіч прызналася, аб чым марыць:

— Я мару аб вольнай Беларусі, і многія мараць. У Беларусі не ўсе могуць сказаць так, як я. Пакуль гэтая ўлада будзе, скажу табе паціху, многія не паедуць туды. А многія паглядзелі, як тут жывуць, у «загніваюшчай Еўропе», і таксама не паедуць назад!