Пра што не жартуе ў Еўропе стэндап-комік Павел Радзевіч

Неўзабаве выйдзе трэці выпуск ютуб-шоў «Пол первого» з Паўлам Радзевічам. Прафесійны стэндап-комік наведаў студыю шпіца Чумкі і пагутарыў з ім пра вяртанне на Радзіму, прызнаўся, на якія тэмы ён не жартуе ў Еўропе, а таксама разам вызначылі, чым еўрапейскія гарады падобныя на беларускія.

Павел Радзевіч нарадзіўся ў Смаргоні, зараз займаецца СММ і стэндапам. Беларус зацікавіўся забаўляльным жанрам у пачатку 2010-х, першы яго выступ перад жывой аўдыторыяй здарыўся ў 2016 годзе, а праз тры гады Павел і яго сябры адкрылі ў Менску «Stand Up Comedy Hall» — першы стэндап-клуб у Беларусі. Таксама Радзевіч удзельнічаў у ўкраінскім гумарыстычным тэлешоў «Студыі Квартал-95» — «Рассмяшы коміка». Цяпер больш за год беларускі комік жыве ў Польшчы. 

Нагадаем, што ў другім выпуску да шпіца заітаў блогер Мікіта Мелказёраў. Самы вядомы сабака Беларусі пагутарыў з Мiкiтам i даведаўся, чым прапагандыст Марат Маркаў лепей за яго, што трэба зрабіць, каб «беглы» блогер змог вярнуцца дадому, па якой сталоўцы ў Менску ён сумуе, чым займаецца ў Варшаве і калі ўжо Мікіта зменіць сваё прозвішча і адпусціць валасы.

У дэбютным выпуску шпіц размаўляў з дарадцай Святланы Ціханоўскай па юрыдычных пытаннях Крысцінай Рыхтэр, якая параіла шпіцу пакусаць свайго гаспадара.  З ёй сабака размаўляў пра новыя пашпарты і рэформу беларускіх судоў, кампенсацыі пацярпелым ад рэжыма і ўмовы вяртання, упарта дапытваўся, ці вернецца беларуска на радзіму. Яны нават пафантазіравалі, якіх палітыкаў у Беларусі трэба пасадзіць або апраўдаць.