Маленькі і крышку патрапаны шпіц паспяхова пакінуў Беларусь і цяпер з'яўляецца вядучым новага канала YouTube «Пол первого». Асцярожна, у яго востры нюх да займальных і яскравых людзей, якія зараз знаходзяцца ў эміграцыі, але працягваюць працаваць і рабіць жыццё цікавым. Некаторыя з іх увогуле будуюць Новую Беларусь.
Напэўна, вы заўважылі, што самы вядомы сабака Беларусі знік з экранаў тэлевізараў і даўно не збіраў ураджай, не катаўся ў вазочку, не ляжаў на стале і не хадзіў на хакей? Аказалася, што ён рыхтаваўся да вельмі сур’ёзнай і складанай задачы. Нават мову чалавечую вывучыў, не тое што некаторыя.
12 з паловай гадзін шпіц Чумка правёў у багажным аддзяленні аўтобуса Мінск-Варшава і нарэшце апынуўся ў Еўропе. Цяпер ён будзе «піліць» кантэнт.
Энергічны і крэатыўны, на сваім @shpitskanal -е ён распавядае аб актыўным ладзе жыцця ў эміграцыі, любіць абмяркоўваць палітыку і эканоміку, раскрывае цікавыя факты і не баіцца задаваць няёмкія пытанні сваім знакамітым гасцям. Таксама вас чакае рубрыка «Гарачая лінія», у якой шпіц адказвае на актуальныя пытанні сваіх гледачоў і глядачак.
Вось што кажа сам Чумка на гэты конт:
— Я вырашыў, як гэта зараз папулярна, стварыць сваё ютуб-шоў «Пол первого». Назву падказалі ў адміністрацыі. Зараз усе ствараюць свае шоў — і жук, і жаба. Чым я горш? Я ж нармальны сабака. Ды і прыехаў я ў Еўропу ня проста так. А з вельмі важнай місіяй. Дамаўляцца. Бо людзі паміж сабой дамовіцца ня могуць. А калі людзі не могуць справіцца са сваімі абавязкамі, ім на дапамогу прыходзіць шпіц Чумка. Шпіцыяльны агент. Да таго ж я адзіны ў сям’і не пад санкцыямі.
Дэбютны выпуск «Пол первого» выходзіць у сераду, 22 лістапада, а 12.30 (па беларускім часе).
Першая госця Чумкі — дарадца офіса Святланы Ціханоўскай па юрыдычных пытаннях — Крысціна Рыхтэр. З ёй шпіц размаўляе пра новыя пашпарты і рэформу беларускіх судоў, кампенсацыі пацярпелым ад рэжыма і ўмовы вяртання. Пафантазіравалі разам, якіх вядомых беларусаў трэба пасадзіць, а якіх — апраўдаць.
Неўзабаве выйдзе выпуск з Мікітам Мелказёравым.
Сачыце за каналам YouTube «Пол первого». Гэта будзе гаў-гаў!
Добро пожаловать в реальность!