Жыхарка Барысава Галіна ўжо дасылала гісторыю пра бабулін амлет для акцыі «Смак часу. Сямейныя рэцэпты». А гэтым разам яна распавяла пра «пастушыны пірог» — беларускую страву, якая мае свае аналагі ў розных краінах.
Галіна гатуе «пастушыны пірог» менавіта так, як гэта рабілі яе продкі — максімальна проста. Ён традыцыйна сытны, бо ў яго аснове бульба і мяса. Галіна хацела хутка прыгатаваць нешта сытнае і смачнае, каб парадаваць дачку ў канцы тыдня, і ўспомніла тое, чым любіла частавацца ў доме сваёй бабулі.
Спачатку Галіна варыць бульбу, якая потым ператвараецца ў пюрэ. У гэты час на патэльні абсмажваецца фарш — часам гэта свіное мяса, часам — курынае, з прыпраўкамі.
Калі ўсё гатова, Галіна раскладвае ў форму для запякання мясную начынку, а зверху акуратна размяркоўвае бульбяное пюрэ.
— Апошнім штрыхам, калі падабаецца, — кажа яна, — можна пасыпаць пірог зелянінай і цёртым сырам, які плавіцца і ператвараецца ў залацістую скарыначку. Такі «пастушыны пірог» не толькі сытны, але і напаўняе дом цудоўным водарам.
Даслаць свой сямейны рэцэпт: @ex_presslive
Добро пожаловать в реальность!