У Варшаве ідуць здымкі маштабнай экранізацыі рамана «Лялька» (Lalka) польскага класіка Баляслава Пруса. Фільм ствараецца ў Польшчы, у асноўным у сталіцы, дзе на вуліцы Кракаўскае Прадмесце ўзнавілі атмасферу Варшавы XIX стагоддзя. Адна з галоўных вуліц горада на два тыдні закрытая для транспарту, здымачная група працуе з раніцы да вечара. Прэм’ера ўжо цяпер успрымаецца як значная культурная падзея для ўсёй Польшчы.
Але, як высвятляецца, гэта гісторыя мае непасрэдную сувязь і з Беларуссю — а менавіта з нашым Жодзіна.
Беларуская «Лялька»
Менавіта ў Жодзіне нарадзіўся і жыў Уладзімір Сіўчыкаў (3 мая 1958 — 19 ліпеня 2021) — беларускі пісьменнік, перакладчык, мастак і выдаўца. У 2017 годзе ён выдаў беларускі пераклад рамана Баляслава Пруса — кнігу «Лялька», якая адкрыла беларускім чытачам шлях да аднаго з найважнейшых твораў польскай літаратуры.
Пераклад, які зрабілі Галіна Жарко і Мікола Хаўстовіч, стаў прыкладам глыбокага і далікатнага пераасэнсавання класікі, дзе захаваны стыль, рытм і культурны кантэкст арыгіналу. Дзякуючы іх працы, чытачы Беларусі могуць пазнаёміцца з творчай спадчынай Пруса на сваёй роднай мове.
Творца, які жыў літаратурай
Уладзімір Сіўчыкаў быў вядомы сваёй шматграннай дзейнасцю. Ён працаваў мастаком-афарміцелем, выкладчыкам, рэдактарам і выдаўцом, актыўна ўдзельнічаў у літаратурным і культурным жыцці краіны. Асаблівае месца ў ягонай працы займала краязнаўства — ён шмат рабіў для вывучэння і папулярызацыі гісторыі роднага Жодзіна.
Его жыццё і творчасць былі прысвечаныя развіццю беларускай мовы, літаратуры і перакладу. Для многіх ён застаўся прыкладам таго, як можна з любоўю і павагай служыць сваёй культуры.
Культурная нітачка паміж Польшчай і Беларуссю
Дык вось, пакуль у Варшаве ажыўлена здымаюць новую экранізацыю «Лялькі», мы можам адзначыць яшчэ адну яе асаблівасць — яна злучае Польшчу, Беларусь і наш горад Жодзіна праз творчасць і памяць пра Уладзіміра Сіўчыкава.
Гэта невялікая, але вельмі каштоўная культурная нітачка, якая нагадвае: літаратура і мова здольныя пераадольваць межы і аб’ядноўваць народы.
Хочаце расказаць сваю навіну? Пiшыце: @ex_presslive
Добро пожаловать в реальность!