Дзень салідарнасці з палітвязнямі Беларусі абвешчаны 21 траўня — у памяць пра Вітольда Ашурка, які загінуў у калоніі чатыры гады таму. З таго часу ў няволі памерлі яшчэ шасцёра беларусаў. У Музеі Вольнай Беларусі ў Варшаве адкрылася выстава «Нічога асабліва новага» — гэта словы, якія часта гучаць у лістах з-за кратаў. Экспазіцыя праз асабістыя рэчы, словы і сведчанні перадае тое, што засталося па-за межамі навінных стужак: штодзённы боль і нябачнае змаганне.
Сёння ў Беларусі несправядліва пазбаўленыя волі як мінімум 1192 чалавекі. Менавіта таму сёлетняя тэма Дня салідарнасці — «салідарнасць як памяць».
У Варшаве, у Музеі Вольнай Беларусі, да гэтага дня адкрылася выстава «Нічога асабліва новага», прысвечаная жыццю і слову беларускіх палітвязняў. Назва ўзята з частай фразы ў іх лістах — за будзённымі словамі хаваецца трагедыя, боль і нязломнасць.
Выстава стваралася ва ўмовах, калі амаль няма артэфактаў, і таму галоўным матэрыялам сталі словы — вершы, запісы, лісты. Побач з імі — асабістыя рэчы зняволеных. «Насамрэч гэта — цішыня, якая крычыць», — кажа куратар праекту Вольга Кліп.
На адкрыцці экспазіцыі прадставілі кніжную частку праекта — «Турэмны дзённік», а таксама новыя выданні серыі «Беларуская турэмная літаратура», сярод якіх кніга Максіма Знака «Закамерон».
Ініцыятарам выставы выступіў Музей Вольнай Беларусі. У праекце ўдзельнічалі цэнтр «Вясна», ініцыятыва «Да Волі», Народнае антыкрызіснае ўпраўленне. Падтрымку аказалі Амбасада Нідэрландаў, мэрыя Варшавы і фундацыя «Trzy Trąby».
Даслаць навіну: @ex_presslive
Добро пожаловать в реальность!