21 чэрвеня на Саскім пляжы над Віслай у Варшаве адбылося традыцыйнае святкаванне Купалля. Арганізатарамі мерапрыемства выступілі тэатральная студыя «Купалінка» і Беларускі Дом у Варшаве. Сёлета ганаровай госцяй свята стала Украіна.
У праграме былі выступленні беларускіх і ўкраінскіх калектываў, а таксама вучняў студыі «Купалінка».
Свята аб’яднала сем’і беларусаў. Асаблівую ўвагу атрымала самая маладая пара, якая ажанілася толькі месяц таму — госці крычалі ім традыцыйнае «Горка!».
Удзельнікі свята частаваліся зефірам «Папараць-кветка» і разнастайнымі прысмакамі.
Госці спаборнічалі ў конкурсах, вучыліся традыцыйным танцам, спевам, пляценню вянкоў і абярэгаў, а таксама адказвалі на пытанні купальскай віктарыны. Адбыўся таксама конкурс на лепшы нацыянальны строй.
Для дзяцей была арганізаваная асобная забаўляльная праграма — міні-Купалле ад Маляваныча.
Госці маглі таксама прыняць удзел у тэматычным круізе на цеплаходзе Dar Mazowsza.
Як і належыць па традыцыі, свята завяршылася купальскімі абрадамі і скокамі праз вогнішча.
Традыцыі Купалля
Купалле — адно з найстаражытнейшых народных святаў, якое беларусы святкуюць у ноч з 6 на 7 ліпеня (у залежнасці ад календара). Яно звязана з летнім сонцастаяннем і ўшанаваннем прыроды, агню, вады і кахання.
Студыя «Купалінка» трэці год ладзіць Купалле на Вісле. Свята стала сімвалам яднання беларусаў у польскай сталіцы.
Хочаце расказаць сваю навіну? Пiшыце: @ex_presslive
Добро пожаловать в реальность!