У нядзелю, 23 сакавіка, ў Варшаве прайшла акцыя, прысвечаная 107-й гадавіне са дня абвяшчэння незалежнасці Беларускай Народнай Рэспублікі.
На плошчы Трох Крыжоў сабраліся сотні беларусаў. З 330-метровым сцягам і плакатамі яны рушылі ў суправаджэнні музыкаў да Замкавай плошчы.
На маршы разам з беларусамі былі ўкраінцы і палякі. Падчас свята гучала шмат музыкі і песень вольнай Беларусі.
Адбылася цырымонія ўзнагароджання за ўклад у развіццё Беларусі. Напярэдадні Дня Волі адпаведны загад падпісала Святлана Ціханоўская.
Намеснік кіраўніка Аб’яднанага пераходнага кабінета Павел Латушка ўручыў медаль ОПК «За плённую працу на карысць Беларусі» польскаму палітолагу і праваабаронцу, былому кіраўніку Усходнееўрапейскага дэмакратычнага цэнтра Паўлу Казанецкаму.
Напярэдадні Следчы камітэт Беларусі заявіў, што ідэнтыфікаваў 400 удзельнікаў акцый пратэсту, якія выйшлі на акцыі за мяжой 26 студзеня. Іх прызналі падазраванымі па крымінальнай справе. Сілавікі таксама пагражаюць тым, хто далучыўся да святкавання Дня Волі.
25 сакавіка 1918 года была абвешчана незалежнасць Беларускай Народнай Рэспублікі. Гэтая дата шырока адзначаецца беларусамі за мяжой. У самой Беларусі апошнія гады свята не святкуецца.
Даслаць навіну: @ex_presslive
Добро пожаловать в реальность!