Чытачка EX-PRESS.BY з Уроцлава даслала фотаздымкi з мясцовага аўтобуса. Сёння, 22 верасня, у Сусветны дзень без аўтамабіля, абсалютна ва ўсім гарадскім транспарце праезд без аплаты. Пра гэта паведамляе валідатар, на якім звычайна можна было купіць квіток картай ці прабіць папяровы білецік.
Беларуска даслала EX-PRESS.BY фота з аўтобуса, на якім ездзіць ледзь не кожны дзень. У дзяўчыны праязны на месяц за 110 злотых (каля 25 еўра). Яна задаволеная, бо ўжо даўно праехала кошт праязнога. Увогуле яна марыць набыць ровар, тады гэта будзе экалагічна i эканамiчна. Кошт на новыя тут вар'іруецца ад 1100 злотых (245 еўра) і ледзь не да бясконцасці. Ровары на барахолцы каштуюць яшчэ танней.
А як у Беларусі?
Паводле інфармацыі БЕЛТА, у Беларусі ў некаторых гарадах кіроўцам прапануюць бясплатны праезд у грамадскім транспарце 22 верасня, у Сусветны дзень без аўтамабіля.
Гэта Мінск, Салігорск, Гародня, Ваўкавыск, Воранава, Слонім, Гомель, Баранавічы, Пінск і яшчэ 8 раёнаў. У Паставах — на асобных маршрутах, а ў Брэсце — у ранішнія і вячэрнія гадзіны пік.
Таксама плануюцца велапрабегі ў Мінску, Наваполацку і Віцебску.
Атрымлiваецца, у Польшчы праезд бясплатны ўсім, а ў Беларусі толькі кіроўцам і не ва ўсіх гарадах. Але ж ёсць да чаго імкнуцца.
Хаціце падзяліцца меркаваннем? Пішыце: @ex_presslive.
Добро пожаловать в реальность!