Настасся ва Уроцлаве зусім нядаўна, але ўжо паспела закахацца ў гэты горад. Упершыню дзяўчына трапіла сюды ў 2019 годзе і загадала жаданне вярнуцца яшчэ раз. Двойчы вярталася, а на трэці візіт засталася тут жыць надоўга. У эміграцыі яна імкнецца не прапускаць цікавыя івэнты і не так даўно трапіла на фестываль гномаў.
«А самыя цярплівыя круцілі кола фартуны і выйгравалі марозiва»
Так, 8-10 верасня ў яе горадзе праходзіў Уроцлаўскі фестываль гномаў. Па словах дзяўчыны, яна не толькі весела бавiла час, але нават паспрабавала марозiва ад шэф-кухара без аплаты:
— Фестываль доўжыўся тры дні. У першы дзень быў парад гномаў, у iм удзельнічалі дзеці, якія былі апранутыя, як гномы. Мэр гораду таксама быў на свяце. Ёсць у інтэрнэце нават вельмі мілы здымак мэра сярод гномаў.
— На другі дзень было сапраўднае свята для ўсіх: было цікава як дзецям, так і дарослым. Субота — гэта дзень, калі родныя праводзяць разам. Некаторыя ў Польшчы працуюць 6 дзён, таму, я думаю, у суботу былі арганізаваны асноўныя актыўнасці, у тым ліку вечарына, але не звычайная, бо ўдзельнікам і ўдзельніцам давалi слухаўкі. Гэта было такiм новым для мяне.
З раніцы ў парку на вуліцы Тэатральнай разбілі горад актыўнасцей, паставілі сцэну, дзе праходзілі спектаклі і інтэрактыўныя праграмы. Для маленькіх зрабілі папяровыя хаткі, якія дзеці самі маглі размаляваць, у хатках яны потым граліся. Побач з імі паставілі розныя гульні для ўсёй сям'і, пачынаючы ад шашак і марскога бою і заканчваючы гульнёй «Вежа».
Было шмат чаго. У прыгожых дэкарацыях можна было зрабіць фотаздымкі на памяць: як жадаеш у мухаморах або побач з велiзарнымі кветкамі, усярэдзіне велiчэзнага імбрыка ці на вялікім кубку з казкі «Аліса ў краіне цудаў». З казкі таксама быў вялікі белы трусік. З ім ахвотна рабілі здымкі і дзеці, і дарослыя. На хадулях перасоўваліся скамарохі.
Жадаючыя маглі змайстраваць з аскепкаў керамікі падстаўку пад кубак ці папяровы цягнік, выйграць прызы ад школы па футболе ці школы танцаў, доўга разглядаць мініятурны горад з чыгункай, па якой ехаў мініятурны цягнік. А самыя цярплівыя круцілі кола фартуны і выйгравалі марозiва:
— Я дачакалася свайго прыза — атрымала марозіва ў вафельнай лодцы са вяршкамі, палітае шакаладным сіропам і ўпрыгожанае чарніцамі і трускаўкамі. Прыемна і бясплатна.
«Кожнаму дзіцяці давалі каўпачок гнома і паветраны шар»
— Што мяне ўразіла, што таты актыўна гулялі з дзецьмі, у парк прыходзілі сем'ямі, — кажа беларуска.
Таксама там была карусель за 5 злотых (крыху больш за 1 еўра), якая ўвесь час была запоўненая дзецьмі і бацькамі:
— Прыгожая і папулярная дзіцячая пляцоўка ні секунды не была пустой. Некаторыя элементы я бачыла ўпершыню, і мне гэта вельмі спадабалася.
Спектаклі, музыка ўвечары, конкурсы і падарункі — такім мне запомніўся суботні дзень. Дарэчы, кожнаму дзіцяці давалі каўпачок гнома і паветраны шар. Гэта было так пацешна: вакол сінія і чырвоныя каўпачкі. Казка.
У трэці дзень, паводле слоў гераіні, было ўжо не так шмат падзей у праграме.
— З раніцы на новай лакацыi, плошчы Solny, дзеці ўпрыгожвалі хатку гнома з фанеры мохам, налепкамі, пацеркамі і бантамі. Там жа можна было ўбачыць гнома, якога дзеці ў суботу зрабілі з кавалкаў бітай керамікі.
Праграма ў трэці дзень праходзіла ў музеях: на экскурсіі і воркшопы трэба было запісвацца загадзя:
— Я патрапіла на экскурсію па горадзе, дзе нам распавялі на польскай мове і паказалі некаторых гномікаў. Гэта было вельмі цікава. Напрыклад, я не ведала, што самы вялікі гном Тата (Papa Krasna) стаіць на падушачцы вялікага пальца. Уяўляеце, якія тады гномы ў рэчаіснасці маленькія! Усе астатнія фігуркі гномаў у некалькі разоў меншыя за Тату. Ён, дарэчы, вельмі важны, бо дае імёны гномам.
Беларуска дадае:
— Мне вельмі спадабалася, як было арганізавана свята. У мяне засталіся прыгожыя здымкі на памяць і прыемныя ўспаміны.
Хочаце даслаць навiну? Пiшыце: @ex_presslive.
Добро пожаловать в реальность!