«Я не карэнная жыхарка Жодзіна — нарадзілася і вырасла ў іншым горадзе, а сюды прыехала па размеркаванні. Мая мама жартам называе мяне «навалач», але за столькі год Жодзіна стаў для мяне родным і любімым горадам. У ім з’явіліся свае «месцы сілы». Адно з такіх — мурал на доме №14 па вуліцы Ракасоўскага», — напісала Марыя для акцыі EX-PRESS.BY «Мой горад».
— «Зямля пад белымі крыламі. І бусел у сінім небе…» — гэты мурал, прысвечаны нарысу Уладзіміра Караткевіча, сімвалізуе для мяне свабоду і надзею. Караткевіч у сваім творы дэталёва распавёў пра Беларусь — пра яе гісторыю, культуру, мову і прыроду, — кажа жанчына.
Гэты мурал, нягледзячы на тое, што размешчаны на даволі праблемным доме, узвышаецца над горадам і як быццам абдымае маю Радзіму. Ён сімвалізуе для мяне непахіснасць, сілу і імкненне да лепшай будучыні.
Гледзячы на мурал, Марыя ўспамінае людзей, якія яго стваралі, асабліва мастака Яўгена Літвінова (LINE), чыя творчасць цяпер вядомая далёка за межамі Беларусі. Гэты мурал — напамін пра яго і пра тое, наколькі прыгожая наша краіна.
— Кожны раз, калі я гляджу на яго, я адчуваю глыбокую любоў да Беларусі і веру, што надыдзе дзень, калі наша краіна і наш народ зведаюць свабоду і росквіт, — кажа жанчына.
Далучыцца да акцыі «Мой горад»: @ex_presslive
Добро пожаловать в реальность!