EX-PRESS.BY трапіў на прагляд гульнявога нямога фільма «Чароўныя нажнічкі».
Фільм «Чароўныя нажнічкі» быў зняты барысаўчанамі ў нашым горадзе без якога-небудзь фінансавання і выключна дзякуючы энтузіязму ўдзельнікаў аўтарскага калектыву.
Чорна-белае мастацкае нямое кіно суправаджаецца жывой музыкай у выкананні невялікага аркестра. Тут ёсць скрыпка, акардэон, бубен і яшчэ шмат цікавых інструментаў.
Беларускамоўная жаночая вакальна-танцавальная група «Жыдовочка» была сабрана адмыслова для фільма. Жаночы калектыў «Жыдовочка» спявае песні на ідыш пачатку 20 стагоддзя і танчыць габрэйскія танцы мястэчак, якія згарэлі ў Халакост.
«Чароўныя нажнічкі» — гэта крыху містычная гісторыя пра краўца і ягоныя прыгоды. Фільм немагчыма знайсці ў сеціве. Кінастужку можна паглядзець толькі ў рэальнай прасторы пад жывое музычнае суправаджэнне.
Матывы габрэйскіх народных казак спадабаліся публіцы: жарты сустракалі ўсмешкамі, барысаўане ўвесь час былі сканцэнтраваны на праглядзе, а напрыканцы падарылі гучныя апладысменты.
Абавязкова ўсім жыхарам нашага мястэчка варта паглядзець гэтае кіно. Яно датычыцца не толькі габрэяў і іх гісторыі, але і кожнага з нас. У сцэнарыі даволі шмат спасылак на наша жыццё.
Пасля сустрэчы разумееш, што забарона людзям танчыць у старым дворыку — кепская ідэя.
Рэжысёр стужкi — Наталля Голава. Кіно атрымалася сапраўды жывым, гульнявым, цікавым і нават кранальным.
Добро пожаловать в реальность!