Беларуска Ганна наведала прыгожы Ўроцлаў і падзялілася здымкамі навагодняга горада. Калядны кірмаш ва Ўроцлаве адкрыўся 24 лістапада і будзе працаваць больш за шэсць тыдняў — да 7 студзеня. Вы яшчэ можаце паспець!
Кірмаш вылучаецца як адзін з лепшых і, безумоўна, самы шырокі ў Польшчы, бо займае большую частку Старога горада Ўроцлава. Па меркаванні амерыканскага «The Huffington Post» і нямецкага «Die Welt», ён таксама з'яўляецца адным з самых прыгожых у Еўропе.
Ганна распавядае:
— Ва Ўроцлаў прыязджае вялізная колькасць турыстаў. Кірмаш размяшчаецца на чатырох пляцоўках: Галоўная плошча, Сьвідніцкая вуліца, Алаўская вуліца і Саляная плошча. Гэта большая частка Старога горада Ўроцлава. Шапікі і атракцыёны будуць працаваць з 10 раніцы да 9 вечара да 7 студзеня. 1 студзеня прылаўкі будуць зачыненыя.
Ганна дзякуе за святочны настрой:
— У нас ёсць магчымасць хоць крыху забыцца пра ўвесь той жах, які адбываецца ў свеце, у маёй любімай Беларусі, ва Ўкраіне, у Ізраілі… Я прыязджаю на кірмаш, каб парадаваць сябе. Цяпер гэта неабходна мне, як ніколі. Я настолькі стамілася за гэты год, што, здаецца, яшчэ крышку — і зламаюся. Чакаю Новага года, як быццам усё кардынальна зменіцца, і я буду шчаслівая. Веру ў цуд, мару вярнуцца хоць на дзень дадому, прайсціся па любімай кляновай алеі, забегчы ў парк каля дома, купіць яблыкі на рынку, зрабіць смузі з чарніцамі і паглядзець кошты ва ўнівермагу…
Дзяўчына разважае пра жыццё:
— Не адразу прыходзіць усведамленне, што трэба клапаціцца аб сабе, аб сваёй душы і целе, пра тое, што ты ясі, пра што думаеш. Які б жах не рабіўся вакол, трэба дарыць сабе маленькае адчуванне шчасця, а можна і вялікае. Я зноў збіраюся на кірмаш. Калі раней я проста назірала і нічога не набывала, сёння еду, каб выпіць крыху глінтвейну, купіць якую-небудзь смачнасць і пракаціцца на каруселі, а потым загадаць жаданне і нават пусціць слязу. Усё будзе добра, я веру і прашу ўсіх верыць і берагчы сябе.
З Калядамі і надыходзячым Новым годам!
Даслаць сваю навіну: @ex_presslive
Добро пожаловать в реальность!