28 лютага ў Музей Вольнай Беларусі у Варшаве адкрылася выстава «Беларусь Напалеона Орды», на якой прадстаўлены рэдкія літаграфіі аднаго з самых вядомых мастакоў беларускага паходжання XIX стагоддзя.
Экспазіцыя арганізавана ініцыятывай MALDZIS, якая раней выкупіла на польскім аўкцыёне ўнікальную калекцыю з 30 літаграфій Напалеона Орды. Дзевятнаццаць з іх прысвечаны архітэктуры і краявідам на тэрыторыі сучаснай Беларусі, астатнія адлюстроўваюць гістарычныя мясціны на тэрыторыях сучасных Літвы, Украіны і Польшчы.
Гістарычная спадчына, захаваная ў графіцы
Літаграфіі былі створаны ў Варшаве ў 1870-я гады ў майстэрні Алоіза Місуровіча на аснове арыгінальных малюнкаў Орды і надрукаваны ў знакамітым альбоме Album Widoków Historycznych Polski. Сам мастак фінансаваў выданне, і ў перыяд з 1873 па 1883 год выйшла восем серый альбома, якія ўключалі 260 прац.
У набытай калекцыі прадстаўлены выявы многіх знакавых мясцін Беларусі, сярод якіх: Нясвіж, Мір, Навагрудак, Ліда, Гомель, Камянец, Крэва, Бялынічы, Лагойскі іншыя гарады і сядзібы.
Гэтыя працы маюць асаблівую каштоўнасць, бо значная частка адлюстраваных Ордам архітэктурных помнікаў была знішчана або істотна зменена ў XX стагоддзі.
Як адзначыў кіраўнік ініцыятывы MALDZIS Павел Мацукевіч, літаграфіі Орды з’яўляюцца важным візуальным сведчаннем культурнай гісторыі і дапамагаюць захаваць памяць пра спадчыну, страчаную з часам.
Экскурсія ад вядомага мастацтвазнаўцы
У першы дзень працы выставы экскурсію для наведвальнікаў правёў вядомы беларускі мастацтвазнаўца і экскурсавод Дзмітрый Салодкі, добра вядомы сваёй дзейнасцю ў Варшаве і за яе межамі.
Яго аповед дазволіў гасцям глыбей зразумець гістарычны кантэкст прац, біяграфію Напалеона Орды і значэнне яго творчасці для беларускай і еўрапейскай культуры. Экскурсія выклікала вялікую цікавасць і стала важнай часткай адкрыцця выставы.
Ад Варшавы — да вяртання на радзіму
Літаграфіі былі набытыя на сродкі беларускіх дабрачынцаў. У будучыні калекцыя будзе перададзена ў музей Напалеона Орды, размешчаны ў адноўленай роднай сядзібе мастака ў Варацэвічах.
Да вяртання на радзіму працы будуць экспанавацца на міжнародных выставах, даючы магчымасць шырокай аўдыторыі пазнаёміцца з гэтай унікальнай спадчынай.
У Варшаве выстава «Беларусь Напалеона Орды» будзе адкрытая для наведвальнікаў да 8 сакавіка 2026 года.
Хочаце даслаць навіну? Мы на сувязі: @ex_presslive
Добро пожаловать в реальность!