Чаму мы апынуліся ў новай, дзіўнай, а часам непрыемнай сітуацыі? Такое пытаньне задаюць вельмі шмат беларусаў пасьля 6 год ад падзей 2020-га, пiша палiтолаг Павел Усаў.
Чаму мы назіраем такі ўпадак вобразаў, міфаў і глыбіннае расчараваньне?
Як мне падаецца, прычына гэтага ў тым, што людзі, якія з’явіліся на вяршыні палітычнай хвалі ў 2020 годзе, якія кудысьці вялі - былі не шчырымі ў сваіх думках, ідэях, дзеяньнях.
"Палітычнае лідэрства" і ўвесь антураж, былі добра зробленай медыйнай кампаніяй, тэатральнай пастаноўкай. Для йх гэтыя падзеі былі гульней, драйвам, прыгожай забавай, якая пвінна была прынесьці нейкія вынікі і якая кепска скончылася.
Так, як і любая тэатральная пастаноўка гэтая гульня, узмоцненая тысячамі галасоў розных смі, у тым ліку расейскіх, адгукнулася у душах беларусаў. Тыя, хто выйшлі на пратэст паверылі ў "новых" лідэраў, паверылі ў йх шчырасьць, прыгажосьць дэкарацыяў.
Зараз, дэкарацыі пасыпаліся, прыгожыя міфы пачалі распадацца. Людзі пабачылі праўдзівы твар актораў-лідэраў, сутнасьць душ, думак, унутраныя жаданьні і матывы.
Адбылося вяртаньне да сябе, зараз палітычныя дзеячы ўжо не іграюць ролі, а сталіся самімі сабой, паказваюць сваю прыроду, шчыра і адкрыта. Бо ўжо няма для чаго і каго ставіць нейкія штучныя пастаноўкі. Адсюль і ўвесь гэта балаган, які мы назіраем, адкат і расчараваньне.
Але, ці зьменіць гэта ўсіх астатніх, тых, хто ўключыўся ў барацьбу ў 2020 годзе? Гэтага не павінна быць. Я сустракаў шмат людзей, якія прайшлі сапраўднае экзыстанцыйнае перараджэньне, можна сказаць хрышчэньне беларускасьцю, і такіх людзей тысячы.
Напэўна гэтага ніхто не чакаў і такой мэты ніхто не ставіў - гэта вынік уласнай унутранай барацьбы са сваім сьветам.
То бок, частка людзей у тым ліку палітыкаў вярнуліся да сябе (да сваіх звычак, нормаў захаваньня), не прайшлі ніякай эвалюцыі, але ўсё ж, ёсьць вялікая колькасьць людзей, прайшоўшых палітычнае і нацыянальнае хрышчэньне ў 2020 годзе, сталі іншымі.
Я думаю, што менавіта з гэтай часткі беларусаў, будзе фарміравацца трэцьцяя хваля беларускай апазіцыі, з’явяцца новыя лідэры, якім не трэба будзе апранаць палітычныя маскі актораў, якія будуць шчырымі ў сваіх дзеяньнях і думках.
Добро пожаловать в реальность!