Амаль ніякае свята беларусаў Кракава не праходзіць без гурта Laleja. Яны робяць майстар-класы і ўдзельнічаюць у мерапрыемствах дыяспары, выступаюць на канцэртах і самі ладзяць святы. 10 сакавіка гурт запрашае на «Гуканне вясны».
Два гады таму вакалістка гуртоў KRIWI і «Джамбібум», этнаспявачка Настасся Хмель была вымушаная пакінуць радзіму і пераехаць у Кракаў.
У мясцовым цэнтры феміністычнай салідарнасці fundacji Autonomia Настасся арганізавала беларускія спеўныя сустрэчы, якія сталі месцам прыцяжэння людзей, якія памятаюць і любяць сваю Беларусь.
Так, пад кіраўніцтвам Настассі Хмель, з самых пявучых удзельніц спеўных сустрэч утварыўся канцэртны склад — этна-гурт Laleja.
Вось што EX-PRESS.BY расказала адна з яго ўдзельніц Наталля:
— Жывучы далёка ад дома, у эміграцыі, мы працягваем заставацца беларусамі, не хочам расставацца са сваёй Радзімай. Таму ёсць вялізнае жаданне падтрымліваць беларускасць.
Ў канцы лютага ўбачылі свет вясновыя песні этна-гурта Laleja. 9 выдатных, шматгалосых спрадвечна беларускіх песень былі запісаны ў адзін альбом. І зараз кожны можа акунуцца ў родную атмасферу, адчуць і радасць і сум і, вядома, надзею і набліжэнне цяпла.
Спасылка на плэйліст вясновых беларускіх песень у YouTube.
Настасся Хмель усё сваё жыццё займаецца творчасцю, грае на некалькіх музычных інструментах, а галоўны яе кірунак — гэта спалучэнне беларускага фальклору з рознымі жанрамі. У яе есць вялікія песеннікі, яна займалася расшыфроўкі фальклору, захоўваючы спадчыну. Яна ладзіла мерапрыемствы яшчэ ў Беларусі. Гэта былі і Купалле, і Гуканне вясны, і Каляды і яшчэ шмат актыўнасці.
Па словах Наталлі, для Laleja Настасся прапаноўвае песні, жанчыны іх выбіраюць, а потым з натхненнем спяваюць. У альбоме вясновых беларускіх песень тыя, што палюбіліся ўсім удзельніцам калектыву...
Паслухаць вясеннія беларускія песні гурта Laleja можна не толькі на іх інтэрнэт-пляцоўцы, але і ўжывую.
Кампанія аматараў і аматарак беларускіх песень і традыцый з Кракава другі год запар ладзіць open-air- імпрэзу «Гуканне вясны» ў чароўным месцы на тэрыторыі Karczmy Kryspinów. І тут не будзе падзелу на выканаўцаў і гледачоў, удзельнічаць будуць усе.
Гуканне вясны адбудзецца 10 сакавіка (нядзеля), пачатак — а 12:00. Вось праграма свята:
12:00 — збор, распальванне вогнішчаў, падрыхтоўка глінтвейну (алка і безалка) і гарбаты, ежы;
13:00 — абрад гукання вясны, спевы;
15:00 — беларускія народныя танцы ад ініцыятывы @krakautancyki.by.
Далей — музычны джэм і open stage для ўсіх ахвотных
Уваход на свята не па квітках. Але просяць усіх, хто жадае далучыцца да імпрэзы, падтрымаць арганізацыю на арэнду прасторы і іншыя выдаткі. Спасылка на збор — у апісанні профілю @krok.krakow.
На тэрыторыі Karczmy Kryspinów ёсць паркінг, месцы для вогнішча і грыля са сталамі і крэсламі, таму можна прыгатаваць шашлык для сваёй кампаніі. Побач — дзіцячая пляцоўка, драўляны памост з відам на возера для прыгожых фота, цёплае памяшканне, дзе можна пагрэцца і паесці. А яшчэ побач карчма, дзе можна набыць ежу і напоі.
Свята абяцае быць вясёлым, па-сапраўднаму вясновым і беларускім. Сюды мае сэнс прыехаць нават з іншых гарадоў і краін, каб адчуць сябе ў свабоднай атмасферы цудоўнай Беларусі.
Падзяліцца меркаваннем: @ex_presslive
Добро пожаловать в реальность!