Наведвальнікам курсаў «Мова Нанова» ва Уроцлаве пашанцавала: госцем на іх занятках стаў вядомы ў Беларусі святар і грамадскі дзеяч Вячаслаў Барок.
Айцец Вячаслаў вёў свой Блог на YouTube, які меў тысячы гледачоў. На канале ён каментаваў падзеі, якія адбываліся ў краіне з пункту гледжання Святога Пісання. Шмат каму гэта не падабалася, і ў 2020-м годзе яго канал, як і іншыя сацыяльныя сеткі, былі прызнаныя «экстрэмісцкімі», і вядома ж, забароненыя. Зараз ксёндз Вячаслаў працуе ў касцёле св. Александра ў Варшаве, дзе праводзіць літургіі на беларускай мове.
Сустрэча прайшла, як кажуць, на адным подыху, было шмат нечаканых і вострых пытанняў аб сучасным стане каталіцкага касцёла і яго ролі ў працэсах, якія адбываюцца ў свеце і на Бацькаўшчыне. І на ўсе пытанні ксёндз адказаў проста і шчыра.
На думку святара, зараз, як і раней, усходняя палітыка Ватыкана не ўлічвае нацыянальныя інтарэсы Беларусі. Таксама, на жаль, сярод беларускіх каталіцкіх святароў і духавенства няма пакуль што такой крытычнай масы, якая б магла супрацьстаяць гэтай шкоднай палітыцы, як гэта было, напрыклад, у Польшчы ў часы кардынала Вышынскага. Бо, як кажа айцец Вячаслаў, пастыры заўсёды павінны быць наперадзе, а ўжо авечкі ісці за імі. А на Беларусі склалася сітуацыя, калі, наадварот, авечкі ідуць наперадзе, і сядзяць па турмах, а пастыры супрацоўнічаюць з уладамі.
Біскупы апранаюцца ў чырвонае адзенне, гэта азначае, што яны могуць праліць сваю кроў за паству. У якасці прыкладу ксёндз расказаў пра менскую журналістку і выкладчыцу каталіцкага каледжу, якая была актывісткай, і апынулася за кратамі толькі за тое, што збірала рэчы і прадукту для палітвязняў. А біскупы ў гэты час цалуюцца з тымі, хто такіх людзей саджае ў турмы.
На пытанне, ці варта прабачаць уладзе яе злачынства, святар адказаў так:
— Я прабачыў усіх злачынцаў з улады і малюся, каб яны хутчэй сустрэліся з правасуддзем. Бо калі яны не адкажуць тут, на зямлі за зло імі ўчыненае, то яны не трапяць у валадарства Божае.
Адным з лепшых было пытанне аб тым, што болей правільна для касцёла: казаць праўду пад пагрозай быць зачыненым і зліквідаваным, ці працягваць дзейнасць, але пад кантролем улады?
— Касцёл, да якога мы прыналежым, — гэта інструмент у руках Бога, — адказаў айцец Вячаслаў. – Мы павінны думаць не аб тым, як захаваць інструмент, а аб тым, як астацца верным Госпаду Богу. Папа Рымскі, біскуп, святар, маюць фундаментальнае заданне не Касцёл захаваць, а праўду гаварыць. А Касцёл захавае Хрыстос.
Адказаў ксёндз і на іншыя нязручныя пытанні. Напрыклад наконт педафіліі, якая часам вырываецца ў касцёле. На гэта святар пагадзіўся, што такая праблема існуе, але, на яго думку, яна многа ў чым штучна раздутая нядобразычліўцамі касцёла. Выпадкаў педафіліі ў свецкіх школах у разы болей, чым у касцёле, што не апраўдвае ніводнага педафіла са святароў. Гэта праблема існуе таксама і ў сем'ях. Касцёл першым падняў гэту праблему.
Напрыканцы сустрэчы святар заахвоціў усіх пакаяцца, навярнуцца і збіраць грошы на танк. А таксама рабіць сваю працу і шукаць аднадумцаў.
Падзяліцца меркаваннем: @ex_presslive
Добро пожаловать в реальность!