У Кракаве 29 ліпеня прайшоў вялікі Беларускі Пікнік. Гэта чацвёрты па ліку фестываль, які ладзіць мясцовая беларуская дыяспара. Ў гэтым годзе ён атрымаў афіцыйную назву Letucień (Летуцень).
«Беларускі Пікнік у Кракаве» — гэта вялікі сямейны фестываль беларускай культуры з вельмі насычанай і разнастайнай праграмай.
Ён праходзіў у парку Ёрдана (Park Henryka Jordana). Першы такі фестываль быў арганізаваны ў 2020 годзе, і менавіта ён задаў фармат нефармальнай летняй сустрэчы беларусаў: пад адкрытым небам, з пледамі і песнямі пад гітару.
Кожны год на пікніку ўсе больш удзельнікаў. За некалькі гадоў фестываль не толькі пашырыўся, але і змянiў фармат, стаў больш інтэрнацыянальным: сярод наведвальнікаў ужо не толькі беларусы, але і ўкраінцы, і палякі.
Менавіта ў гэтым годзе Пікнік атрымаў афіцыйную назву — Letucień. На фестывалі працавалі больш за 40 валанцёраў, мэта якіх — аб'ядноўваць беларусаў і беларусак, каб умацоўваць дыяспару ў Кракаве і разам ствараць карысныя і яскравыя праекты.
Наша чытачка Наталля была ўдзельніцай фестывалю, а яе муж з дачкой — валанцёрамі. Яны разам з іншымі беларусамі пачалі працаваць задоўга да пачатку фестывалю, каб усё было на ўзроўні. А на самім пікніку працавалі аж 14 гадзін. Вось што Наталля распавяла EX-PRESS.LIVE:
— Гэта было сапраўды вялікае мерапрыемства з вялікай колькасцю розных пляцовак, на якіх адбываліся ў розны час розныя актыўнасці. Былi і спартыўныя мерапрыемствы, і абмеркаванні сённяшніх падзей у Беларусі, і забаўляльныя праграмы.
Маляваныч рабіў варштат па тэатральнай дзейнасці для дарослых і дзяцей. На фудкорце мясцовыя фермеры смажылі дранікі і сыр, папулярныя ў дыяспары.
На канцэрце спявалі кракаўскі беларускі этна-гурт пад кіраўніцтвам Насты Хмель, Алена Жалудок, а яшчэ Ана Мова, Iva Sativa і гурт РСП. Вельмі шмат было моладзі.
«Рух Беларускай Салідарнасці» прадставіў медыя Lixtar, прайшла кампанія за беларускую мову ў польскіх школах.
Па словах беларускi, на ўсё паспець было немагчыма. І на кожны густ было нешта цікавае.
Наталля кажа:
— На такім мерапрыемстве арганізатары не зарабляюць. Шмат чаго тут адбывалася дзякуючы добрай волі людзей. І не мала — за сродкі саміх арганізатараў. Бо на зборы, які праходзіў папярэдне, сабралі грошай недастаткова.
Мы можам казаць: якасць мерапрыемства была вельмі высокая! А ў параўнанні з мерапрыемствамі ў Беларусі, на якія з бюджэту многа грошай ідзе, гэта вельмі-вельмі высокая якасць. Усё тое, што робіцца з добрым помыслам, мае сэнс і выдатны вынік. Гэтым Пiкнiком будзем жыць цэлы год...
Хочаце расказаць сваю гiсторыю? Пiшыце: @ex_presslive.
Добро пожаловать в реальность!