Экс-палітвязень з Гродна Аляксей Аўсюкевіч памёр ва ўзросце 41 года. Гэта здарылася 11 кастрычніка 2024-га, але вядома стала толькі цяпер, піша "Наша Ніва".
Аўсюкевіч працаваў рабочым — на "Цеплавых сетках", якія належаць "Гроднаэнерга", і ў іншых прадпрыемствах Гродна. Мужчыну абвінавацілі ў абразе Лукашэнкі і асудзілі на "хатнюю хімію". Паводле праекта Digital Intelligence Team, Аўсюкевіч быў у базе "Беспарадкі". 28 кастрычніка 2022 года яго ўключылі ў міліцэйскі спіс "экстрэмістаў" — звычайна гэта азначае, што крымінальны прысуд набыў моц.
У чым была абраза Лукашэнкі — невядома. Журналісты прааналізавалі сацсеткі Аўсюкевіча. Там сустракаюцца цытаты расійскага палітыка Уладзіміра Жырыноўскага, кампліменты Сталіну, розныя Z-легенды. Разам з тым ёсць здымкі гродзенца з помнікам Льву Сапегу і дошкай у памяць Міхала Казіміра Агінскага.
Невядома, ці лічыўся яшчэ Аўсюкевіч на "хатняй хіміі" на момант смерці, адзначае "Наша Ніва". Пазначаная прычына смерці — R99, што азначае "іншыя неўдакладненыя прычыны смерці". Гэта сведчыць, што доктар адразу быў няўпэўнены ў прычыне смерці або падазраваў крымінальную прычыну. Напрыклад, такі ж код у базах стаіць у звестках пра смерць міністра замежных спраў Уладзіміра Макея і палітвязня Вітольда Ашурка.
Добро пожаловать в реальность!