Сварка з Уладзімірам Зяленскім падчас яго візіту ў Вашынгтон 28 лютага была метадам ціску на кіраўніцтва Украіны. Гэта пацвердзіў Дональд Трамп у размове з журналістамі 17 сакавіка.
"Нам трэба было прымусіць Украіну рабіць правільныя рэчы. Гэта была няпростая сітуацыя. Вы ўбачылі невялікую сцэну ў Авальным кабінеце, але я думаю, што цяпер яны робяць правільныя рэчы, і мы спрабуем дасягнуць мірнага пагаднення, дасягнуць спынення агню, а затым і мірнага пагаднення", — заявіў прэзідэнт ЗША.
Ён лічыць свае дзеянні правільнымі і абгрунтоўвае іх тым, што вайна на тэрыторыі Украіны каштуе мноства жыццяў.
Таксама Трамп заявіў, быццам спыненне паставак узбраення і разведданых Украіне не мела ніякіх наступстваў для ўкраінскай арміі ў Курскай вобласці Расіі. "Зусім наадварот, я думаю, гэта было ацэнена, і мы павінны разумець, і вы павінны разумець, што калі я бачу, як хтосьці робіць нешта дрэннае, што прывядзе да вялікай колькасці смерцяў, адзіная прычына, чаму я ўмешваюся — гэта чалавечнасць. Я ўмешваюся дзеля чалавечнасці, таму што там гіне шмат людзей", — выказаўся ён.
28 лютага ў авальным кабінеце Белага дома адбылася сустрэча Зяленскага з Трампам і віцэ-прэзідэнтам ЗША Джэй Дзі Вэнсам. Па выніках яе бакі мусілі падпісаць пагадненне аб доступе ЗША да ўкраінскіх прыродных рэсурсаў. Аднак усё скончылася публічнай сваркай, пасля якой Трамп абвінаваціў украінскага прэзідэнта ў нежаданні заканчваць вайну з Расіяй. Пасля гэтага ЗША на пэўны час спынілі пастаўкі зброі і разведданых Кіеву.
Добро пожаловать в реальность!