«Як прадаць участак, калі ты за мяжой? У год каля 200-300 рублёў забіраюць, проста на абслугоўванне і зборы, але нас там няма.. а зараз яшчэ штрафы будуць, што не косім траву» — задала пытанне чытачка EX-PRESS.LIVE.
На падобнае пытанне ўжо даваўся адказ у адной з публікацый на сайце некалькі месяцаў таму.
На пытанне адказвае юрыст Анатоль Маркевiч:
— Згодна з цывільным заканадаўствам да нерухомых рэчаў (нерухомая маёмасць, нерухомасць) належаць зямельныя ўчасткі, участкі нетраў, паверхневыя водныя аб’екты і ўсё, што трывала звязана з зямлёю, то бок аб’екты, перамяшчэнне якіх без несувымернай шкоды іх прызначэнню немагчыма, у тым ліку лясы, шматгадовыя насаджэнні, капітальныя будовы (будынкі, пабудовы), незавершаныя закансерваваныя капітальныя будовы, ізаляваныя памяшканні, машына-месцы.
Да нерухомых рэчаў таксама прыраўноўваюцца прадпрыемства ў цэлым як маёмасны комплекс, падлягаючыя дзяржаўнай рэгістрацыі паветраныя і марскія судны, судны ўнутранага плавання, судны плавання «рака-мора», касмічныя аб’екты. Заканадаўчымі актамі да нерухомых рэчаў могуць быць аднесена і іншая маёмасць.
Усе аперацыі па продажу нерухомасці, якая засталася ў Беларусі, грамадзянамі, каторыя знаходзяцца па-за яе межамі, праводзяцца прыкладна па адным алгарытме, які быў апісаны.
Першае, што спатрэбіцца, гэта дапамога трэцяй асобы, якой вы безумоўна давяраеце. На гэтага грамадзяніна трэба будзе аформіць адпаведную даверанасць, у якой указаць канкрэтную маёмасць і дзеянні па яе адчужэнні. У выпадку сталага пражывання за мяжой даверанасць можа быць аформлена ў консульстве Рэспублікі Беларусь, а таксама ў натарыяльнай канторы (у гэтым выпадку даверанасць перакладаецца на беларускую або рускую мовы і завяраецца апастылем). Пасля належнага афармлення дакумента давераная асоба зможа заняцца продажам нерухомасці на законных падставах.
Яшчэ адзін варыянт — дамова з рыэлтарскім агенцтвам. У гэтым выпадку ў чалавека, на якога аформленая даверанасць, застануцца фармальныя функцыі — узгадніць дзеянні агента, падпісаць дакументы, атрымаць разлік і г.д.
Ёсць пытаннi да юрыста? Пiшыце: @ex_presslive.
Добро пожаловать в реальность!