Тры мірныя жыхары загінулі, восем атрымалі раненьні ў выніку атакі расейскага дрона ў прыфрантавым Херсоне, піша Свабода.
Як паведаміў кіраўнік ваеннай адміністрацыі Херсонскай вобласьці Аляксандр Пракудзін, 1 сьнежня бесьпілётнік скінуў выбуховае прыстасаваньне на маршрутнае таксі ў Дняпроўскім раёне горада.
«Сёньня Расея зноў паказала свой сапраўдны твар. У гадавіну рэфэрэндуму аб незалежнасці Ўкраіны вораг зноў нанёс удар па мірных жыхарах, скінуўшы выбухоўку на маршрутнае таксі», — напісаў Пракудзін у тэлеграме.
Раней УСУ паведамілі, што ў ноч на 1 сьнежня расейскае войска атакавала Ўкраіну з выкарыстаньнем 78 дронаў. Украінскім сілам удалося зьбіць 32 зь іх, яшчэ 45, як мяркуецца, былі выведзеныя з ладу сродкамі радыёэлектроннай барацьбы.
На працягу тыдня расейскія войскі выкарыстоўвалі для ўдараў па Ўкраіне больш за 500 кіраваных авіяцыйных бомб, амаль 660 бесьпілётнікаў і каля 120 ракет розных тыпаў, паведаміў прэзыдэнт Украіны Ўладзімір Зяленскі.
«Ні адна краіна сьвету не сутыкалася з падобнымі атакамі кожны дзень на працягу такога доўгага часу», — напісаў ён у тэлеграм-канале.
Расейскае кіраўніцтва адмаўляе, што расейская армія падчас поўнамаштабнай вайны наносіць кропкавыя ўдары па грамадзянскай інфраструктуры ўкраінскіх гарадоў і вёсак, забіваючы мірнае насельніцтва і разбураючы шпіталі, школы, дзіцячыя сады, аб’екты энэрга- і водазабесьпячэньня.
Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы з боку Расеі і падкрэсьліваюць, што яны носяць мэтанакіраваны характар.
Добро пожаловать в реальность!