Палітычны аглядальнік Валер Карбалевіч — пра прыстасаванне беларусаў да рэальнасці і чаму Лукашэнку не задавальняе моладзь.
— Што робіць грамадства, калі яму не даюць рэалізоўваць свае магчымасці? Першае — гэта масавая эміграцыя. Кажуць, што ўжо выехала 600-800 тысяч беларусаў, і гэты працэс працягваецца. Другі момант — прыстасаванне да рэальнасці, — кажа Валер Карбалевіч у інтэрв'ю Мікіту Мелказёраву на канале Жыццё-маліна.
Беларусы, якія ў значнай ступені пратэставалі ў 2020-м, сёння спрабуюць прыстасавацца, дэпалітызавацца і жыць сваім прыватным жыццём: сям'ей, працай. Гэта — новая нармальнасць.
— Нават у часы вайны соцыўм спрабуе выжыць. Тут таксама — у складанай сітуацыі людзі спрабуюць не трапіць ў турму і прыстасоўваюцца да рэальнасці.
Апошнім часам, заўважае палітычны аглядальнік, Лукашэнка асабліва скардзіцца на моладзь: маўляў, яна не такая, увесь час у смартфонах.
— Ён дрэнна разумее моладзь, як і тое, што дрэнна атрымоўваецца яе кантраляваць. Раней усё было зразумела: школа, войска, два-тры тэлеканалы, якія глядзела ўся краіна. Гэта была манаполія на інфармацыю, ідэалогію — таму ўся краіна, у тым ліку моладзь, атрымоўвала ту інфармацыю і каштоўнасці, што і старэйшае пакаленне.
Цяпер сітуацыя змянілася. Зусім іншая інфармацыйная карціна, велізарная колькасць крыніц. Манаполія ўлады на інфармацыю знікла. І гэта стварае пэўную напружанасць і неразуменне, бо апроч школы і ўніверсітэтаў з іх прапагандай ёсць іншыя каналы інфармацыі, якія ўлада не кантралюе. Лукашэнка гэта разумее, але не ведае, што з гэтым рабіць, і гэта яго непакоіць.
Замест таго, каб спрабаваць гуляць на хвалі, якой жыве моладзь, ён не хоча спрабаваць размаўляць на мове, якой гаворыць яна. Ён спрабуе яе пераканаць ў справядлівасці, вернасці сваіх пастулатаў.
Пасля 2020 года Лукашэнка катэгарычна адмовіўся шукаць супрацоўніцтва з людзьмі, якія супраць яго пратэставалі.
Не спрабаваў даць адказ на праблемы, якія яму ставілі. Увогуле адмаўляў мець права на свой пункт гледжання.
З дапамогай сілы ён імкнецца пераканаць іх у тым, што яны не маюць рацыі, што трэба думаць так, як ён, і як даводзіць дзяржаўная прапаганда.
Гэта вялікая праблема, бо раптам выяўляецца, што нейкія маладзёны паказваюць флэшмобы, білеты па гісторыі рвуць і выкідваюць, а пасля іх прымушаюць каяцца. Але гэта праблема невырашальная, бо Лукашэнка катэгарычна адмаўляецца размаўляць з моладдзю на яе мове.
Карбалевіч лічыць, што, як толькі ў краіне зменіцца грамадская сітуацыя, хутка пачнуцца перамены ў каштоўнасцях людзей, у іх палітычных поглядах.
— Я скептычна стаўлюся да сацыёлагаў, якія кажуць, што павялічылася падтрымка ўлады і яе палітычнага курса. Проста людзі прыстасоўваюцца. І 2020 год паказаў, як хутка мяняюцца грамадзкія настроі.
Думаю, як толькі мы пабачым, што рэжым адчыніў нейкую фортачку, настроі зменяцца, і не ў той бок, які хоча накіраваць Лукашэнка.
Добро пожаловать в реальность!