Узмацненьне культу асобы Лукашэнкі, мілітарызацыя краіны па ўсіх напрамках і ручное кіраваньне эканомікай. Гэта некаторыя з асноўных трэндаў, па якіх рухаецца краіна. Гаворка пра іх ідзе ў сумесным аналітычным дакладзе экспэртаў — «Беларускі трэкер перамен».
Высновы гэтай справаздачы камэнтуе гісторык і палітоляг Аляксандар Фрыдман.
Экспэрты праекту адзначаюць, што ўлады ўзялі курс на «адмову нават ад кіраваных экспэрымэнтаў зь пераразьмеркаваньнем палітычнага ўплыву ўнутры сыстэмы». Фрыдман, аднак, лічыць, што на бліжэйшых прэзыдэнцкіх выбарах у 2025 годзе Лукашэнка будзе старацца стварыць прынамсі ілюзію палітычнай барацьбы.
Цалкам размову глядзіце ў відэафармаце на Youtube.
«Думаю, што безальтэрнатыўныя выбары — гэта зашмат нават для Лукашэнкі. Ён закладнік сёньняшняга палітычнага становішча. Пакуль цяжка знайсьці нейкую пэрсону, якая змагла б выступіць на гэтых выбарах. Цяжка ўявіць, што можа казаць умоўны кандыдат Гайдукевіч, калі ён ужо казаў, што найлепшае, што напаткала Беларусь, — гэта Лукашэнка. Калі чалавек выходзіць з такім пасылам на выбары, то гэта гратэскава нават па мерках беларускай дыктатуры. Таму ім трэба будзе знайсьці нейкіх кандыдатаў. Пакуль іх ня бачна. Магчыма, Гайдукевіч і Чэрачань. Гэта ў нейкім сэнсе будзе пасаваць, бо Лукашэнка намеціў для сябе вынік у 90%, магчыма нават больш. Яму абавязкова трэба перабіць дасягненьне Пуціна — 87%. Каб яны не знайшлі, у Лукашэнкі будзе 90%+». – кажа Фрыдман.
У каманду праекту «Беларускі трэкер пераменаў» уваходзяць заснавальнік агенцтва Sense Analytics Арцём Шрайбман, асацыяваны аналітык Эўрапейскай рады ў міжнародных адносінах Павел Сьлюнькін, акадэмічны дырэктар BEROC Леў Львоўскі, дырэктарка і старшы супрацоўнік Цэнтру новых ідэяў Леся Руднік і Генадзь Коршунаў, а таксама незалежны сацыёляг Філіп Біканаў.
Добро пожаловать в реальность!