Прагноз песімістычны: у фондзе мяркуюць, што сілавікі паспрабуюць адшукаць усіх інфарматараў.
Больш за 250 жыхароў Гомельскай вобласці затрыманыя з пачатку 2025 года па справе «Беларускага гаюна».
Ніякай афіцыйнай інфармацыі пра колькасць затрыманых няма. Анлайн-выданне «Флагшток» спасылаецца на асабістыя інсайты, у тым ліку атрыманыя ад сяброў і блізкіх фігурантаў спраў.
Людзей арыштоўваюць паволе крымінальнага артыкула аб «садзейнічанні экстрэмісцкай дзейнасці».
У спісах на затрыманне, па звестках выдання, могуць знаходзіцца больш за тысячу чалавек.
У лютым гэтага года сілавікі атрымалі доступ да базы кантактаў маніторынгавага праекту «Беларускі гаюн», нагадвае Салідарнасць. З таго часу ў праваабаронцаў пачалі з’яўляцца звесткі пра затрыманых людзей, якія дасылалі інфармацыю ў праект з моманту ўварвання Расіі ва Украіну.
Больш за ўсё пацярпелых фіксавалі ў Гомельскай вобласці.
— Так, апублікаваныя лічбы могуць адпавядаць рэчаіснасці, — пацвердзілі ў экспрэс-каментары «Салідарнасці» ў BYSOL. — Справа «Гаюна» для ўладаў і сілавікоў застаецца ў прыярытэце.
Гэта не проста працяг рэпрэсій, а асобны кірунак. Перадачу інфармацыі пра перасоўванне войскаў, нават расейскіх, улады ўспрымаюць, як асаблівую небяспеку.
Мы назіраем таксама, што затрыманні па справе «Гаюна» часта неапраўдана жорсткія. Яны адбываюцца з групамі захопу і сілавым элементам. Людзей адразу адпраўляюць у ізалятары.
Не выключана, што перад вучэннямі «Захад-2025» або падчас іх можа адбыцца шэраг паказальных судоў. Пакуль што гэтыя суды праходзілі без вялікага розгаласу, але ў «экспрэс-тэмпе».
У публікацыі «Флагштока» пішуць пра тое, што затрыманні праводзяць ГУБАЗіК і АМАП. Паводле нашых назіранняў, гэтым кірункам больш актыўна займаецца КДБ, падобна, што гэтую справу аддалі менавіта ім.
— Ці павялічылася ў сувязі з гэтым колькасць тых, хто звяртаецца да вас па дапамогу?
— Мы не бачым моцнага росту зваротаў па дапамогу ў сувязі з гэтай справай. Гэта можа тлумачыцца менавіта тым, што людзей хапаюць адразу і да суда не выпускаюць, няма варыянту з выклікамі на допыт і г.д.
Таксама людзі, якія сапраўды дасылалі інфармацыю «Гаюну», могуць цяпер апасацца звяртацца да праваабаронцаў.
— Што рабіць гэтым людзям цяпер, ці ёсць для іх нейкія парады?
— Лепш звяртацца да нас на гарачую лінію @help_bysol. Там параяць, што рабіць у кожным выпадку.
На жаль, агулам маем песімістычны прагноз — сілавікі не будуць спыняцца, яны паспрабуюць знайсці ўсіх.
Адзіная гіпотэза: можа, крыху супакояцца пасля вучэнняў, у тым выпадку, калі ўся гэтая аперацыя менавіта пад іх рабілася.
Добро пожаловать в реальность!