Сваю акцыю беларускія хакеры прымеркавалі расейскаму дзяржаўнаму сьвяту «Дзень Расеі», які прайшоў 12 чэрвеня, піша "Свабода".
У прыватнасьці, сайт «Нефтегазоэксперт» беларускія праломнікі аформілі кадрамі вайны ва Ўкраіне, каб нагадаць расейцам пра вайну, якую пачала іх краіна супраць суседняй Украіны.
«Сёньняшні дзень Расеі — гэта ганебнае сьвята тых, хто намагаецца піраваць на касьцях і крыві тысячаў мірных людзей і ваяроў, загіблых за свабоду і незалежнасьць ад расейскіх захопнікаў. Не дазволім пра гэта забыць.
За свабодную Ўкраіну і Беларусь! Разам да Перамогі», — напісалі ў сваім тэлеграм-канале «Кібэрпартызаны».
Акрамя таго, арганізацыя ўзламала 95 сайтаў адміністрацый па ўсёй Расеі. Іх таксама аформілі кадрамі вайны ва Ўкраіне.
«Ганьба людзям, якія заплюшчваюць вочы і нават падтрымліваюць боль і гвалт „русского мира“. Альбо лічаць, што іх гэта не датычыцца, бо непасрэдна над іх галовамі не лятаюць ракеты», — дадалі «Кібэрпартызаны».
Сярод апошніх дзеяньняў беларускіх праломнікаў вядомая справа мужа журналісткі Вольгі Сямашкі, якому спэцслужбы Беларусі раней выдалі так званы «пашпарт прыкрыцьця». Арганізацыя займае праўкраінскую пазыцыю ў вайне і ўжо выкрыла шэраг наймітаў зь беларускімі пашпартамі, якія падпісалі кантракты з расейскім войскам і адправіліся на вайну.
«Кібэрпартызаны» — беларуская дэцэнтралізаваная супольнасьць ананімных хакераў, зьявілася ў верасьні 2020 году.
Атрымалі вядомасьць дзякуючы шэрагу пасьпяховых кібэратак на рэсурсы дзяржаўных установаў і сілавых структураў Беларусі, публікацыям кампрамату на прадстаўнікоў апошніх, а таксама разьмяшчэньню у адкрытым доступе службовай і сакрэтнай інфармацыі.
Супольнасьць пачала дзейнасьць у адказ на дзяржаўныя рэпрэсіі супраць пратэстоўцаў.
Сваю дзейнасьць «Кібэрпартызаны» называюць барацьбой з Аляксандрам Лукашэнкам.
Добро пожаловать в реальность!