Мэдаль Францішка Скарыны атрымала нявестка Аляксандра Лукашэнкі Ганна Лукашэнка, якая пад творчым псэўданімам Ганна Сялук напісала такія кампазыцыі як «Ах, Аляксандр», «Бульба-дэнс», гімн Генпракуратуры «Захавальнікі права» і песьню да Дня народнага адзінства, перадае Свабода.
Ганна Лукашэнка — жонка сярэдняга сына Лукашэнкі Дзьмітрыя. Перад прэзыдэнцкімі выбарамі 2025 году яна арганізавала кампанію агітацыі за Лукашэнку пад маркай «Маратону адзінства».
Таксама Ганна Лукашэнка зьяўляецца генэральным прадусарам «Музычнай мэдыякампаніі», зарэгістраваная ў ліпені 2022 году ў Цэнтральным раёне Менску. Адрас супадае з адрасам Палаца Рэспублікі. Гэтая кампанія ўваходзіць у рэестар Мінкульту, што дазваляе ёй арганізоўваць масавыя мерапрыемствы.
Ганна Лукашэнка (Сялук) двойчы перамагала на конкурсе «Песьня году Беларусі» як лепшы аўтар словаў — у 2023 і 2024 гадах. Таксама атрымала дыплём расейскай прэміі «Шансон года — 2024».
Аляксандар Лукашэнка ўжо раней узнагроджваў сваю нявестку Ганну адмысловай прэміяй за «вялікі асабісты ўнёсак у разьвіцьцё сучаснага музычнага мастацтва, рэалізацыю сацыяльна значных культурных ініцыятыў».
Разам з Ганнай Лукашэнкай мэдаль Францішка Скарыны атрымалі настаўніца інфарматыкі гімназіі № 1 Берасьця Ірына Гарбацэвіч і дырэктар ТАА «Музычная мэдыякампанія» Андрэй Гузель.
Агулам дзяржаўныя ўзнагароды і падзякі ад Лукашэнкі атрымалі больш за 60 прадстаўнікоў розных сфэр дзейнасьці.
Мэдалём Францішка Скарыны ўзнагароджваюць работнікаў навукі, адукацыі і культуры за «выдатныя дасягненьні ў прафэсійнай дзейнасьці, значны асабісты ўнёсак у разьвіцьцё і памнажэньне духоўнага і інтэлектуальнага патэнцыялу, культурнай спадчыны беларускага народа».
Добро пожаловать в реальность!