«Рэцэпт квяцістай капусты з печывам ад бабулі я таксама перадам сваім унукам», — напісала EX-PRESS.BY чытачка Наста для акцыі «Смак часу: сямейныя рэцэпты».
Пра сваю бабулю дзяўчына можа распавядаць доўга:
— Яна была настаўніцай, інтэлігентнай, строгай, увесь час шукала рэцэпты даўгалецця, штогод расціла таматы і вельмі любіла агрэст. Яшчэ добра памятаю яе булачкі на дражджах з макам і разынкамі.
Бабулі няма побач ужо шмат гадоў, я яе забываю пакрысе, на жаль. Памяць захавала рэцэпты, звычкі і парады, якімі дзялілася яна пры жыцці. Для мяне было важна зафіксаваць гэта ўсё, каб можна было перадаць далей. Для мяне важна ведаць імя прабабуль і прадзядуль, каб і мае дзеці гэта ведалі. Нашы продкі перадаюць нам значна болей, чым гены, яны даюць нам парады і звычкі, якія могуць быць карыснымі, якія выратоўваюць нас.
Беларуска ўдзячна сваёй бабулі за веды ў галіне здароўя, за карысныя заняткі спортам і гартаванне, за кампоты і салаты ўлетку, якія гатавалі ў сям’і па чарзе, за кашы на сняданкі, а не кукурузныя шакаладныя шматкі з малаком:
— Я таксама ўдзячна за адсутнасць хіміі ў нашым доме, як на кухні, так і бытавой: мы выкарыстоўвалі натуральныя сродкі. Бабуля і дзядуля навучылі мяне клапаціцца пра здароўе, паказалі, якія каштоўныя прадукты са свайго агарода і сада (якія былі смачныя яблыкі і слівы, а грушы!), якія цудоўныя і смачныя ягады ў лесе. Мы хадзілі зранку на ціхае паляванне, смачныя грыбы варылі, а потым елі суп і смажылі са смятанай. Усе гэтыя ўспаміны саграваюць сэрца. Я сумую па іх. На жаль, гэта засталося толькі ў памяці...
Настасся кажа, як толькі пабачыла артыкул пра рэцэпты ад бабуль, адразу вырашыла набыць улюблёную квяцістую капусту і прыгатаваць самую простую, але такую смачную страву.
Інгрэдыенты:
квяцістая капуста;
печыва.
Прыгатаванне:
1. Адварыць капусту (15 хвілін будзе дастаткова).
2. Нацерці печыва альбо паламаць рукамі.
3. Адкінуць капусту на талерку і пасыпаць печывам.
Смачна есці!
Жадаеце падзяліцца рэцэптам ад бабулі? Пішыце: @ex_presslive
Добро пожаловать в реальность!