На платформе BYSOL абвешчаны збор сродкаў на ўсталяванне помніка палітвязню Ігару Ледніку, які памёр у калоніі 20 лютага 2024 года. Мэта збору — 2000 еўра.
«Я адкрываю гэты збор, каб ушанаваць памяць майго бацькі, які загінуў за кратамі ад рук рэжыму. Сродкі будуць накіраваныя на ўсталяванне помніка», — напісаў сын Ігара Ледніка.
Былы член Беларускай сацыял-дэмакратычнай партыі (Грамада) Ігар Леднік быў затрыманы 12 красавіка 2022 года. Яго прыгаварылі да 3 гадоў пазбаўлення волі за «паклёп» на Лукашэнку пасля публікацыі ў партыйным часопісе БСДП «Пазіцыя». Улады таксама прызналі профіль Ігара Ледніка ў Facebook «экстрэмісцкім матэрыялам».
У Ледніка была інваліднасць ІІ групы з-за праблем з сэрцам. У калоніі яго здароўе пагоршылася, ён перанёс аперацыю на страўнікава-кішачным тракце. 63-гадовы Леднік памёр у турэмным шпіталі, куды быў планава дастаўлены з бабруйскай калоніі. Прычынай смерці назвалі спыненне сэрца.
Ледніка пахавалі ў Барысаве, дзе жыў грамадскі дзеяч. Развітацца з ім прыехалі каля 10 чалавек з-за пагрозы затрымання.
Збор сродкаў на помнік Ігару Ледніку — гэта магчымасць ушанаваць яго памяць і выказаць салідарнасць з яго сям'ёй.
Далучыцца да збору можна па спасылцы.
Падзяліцца меркаваннем: @ex_presslive
Добро пожаловать в реальность!