З’явілася гульня пад назвай «52». У ёй сабраныя нечаканыя пытанні, якія дазваляюць лепш раскрыць чалавека. Гэтыя пытанні грунтуюцца на этычных дылемах, філасофскіх і псіхалагічных альтэрнатывах, ды каштоўнасным выбары. Аўтар праекта — пісьменнік, празаік, навуковец і грамадскі дзеяч Кірыл Стаселька, які нарадзіўся ў Барысаве.
Калі вы хочаце лепш зразумець сваіх сяброў і стаць з імі яшчэ бліжэй, калі вы хочаце лепш усведамляць самога сябе, то гэтая гульня акурат для вас. Граць у яе можна як у кампаніі, так і аднаму.
Сам аўтар кажа наступнае пра гульню:
— Калі я ствараў гэтую гульню, то матываваўся двума аспектамі. З аднаго боку, гэта той тэмп жыцця, які сёння ёсць, і патрэба часам спыніцца і пры дапамозе нейкага першаснага інструмента зрабіць рэфлексію, падумаць пра сябе і сваё жыццё. Штодзённа гэта не выпадае, а трэба нейкая нагода, якая падштурхне падумаць пра сябе. З іншага боку, і гэта тычыцца тых, хто быў вымушаны з’ехаць з Беларусі, гэта таксама пытанне стрэсу, якасці жыцця, задаволенасці сваім жыццём, далейшых перспектыў.
Беларус прызнаецца, што яму хацелася, каб гэтая гульня была нагодай задаць сабе такія пытанні:
— Ды ўвогуле для тых, хто ў Беларусі, задаць пытанне: што адбываецца ў тваім жыцці, куды яно рухаецца, якім чынам будзе рухацца далей. Хацелася, каб гэта гульня, з аднаго боку, была асабістым інструментам, і таму ў яе можна гуляць аднаму, але таксама яна можа быць і для кампаніі, тады гэта — інструмент лепш пазнаёміцца з сябрамі, блізкімі. Гэта адбываецца на падставе больш глыбокіх рэчаў, якія не ўсплываюць у звычайных размовах, якія толькі адчуваюцца. Гэта пытанні, якія проста так не спытаеш. А дзякуючы гэтай гульне, яны дапамогуць зразумець увогуле каштоўнасці, мэты, сэнсы, і тое, на якім падмурку гэта ўсё знаходзіцца.
Стаселька лічыць, што адны і тыя ж людзі, нават якія вельмі блізка сябруюць, на адныя і тыя ж пытанні могуць адказваць цалкам супрацьлеглым чынам.
— Мне хочацца, каб гэтыя рэчы намацаліся, каб людзі адно аднога зразумелі, — кажа ён.
У адрозненні ад іншых гульняў яна можа быць і фанавай, вясёлай і цікавай, але гэта не першасны і абавязковы элемент:
— Гэта не значыць, што будзе весела і смешна. Гэта перш за ўсё такая інтымная рэч, блізкая. У той жа час гульня накіравана, калі мы кажам пра кампанію, на стварэнне атмасферы даверу, гэта нешта ўтульнае, закрытае, тое, што не выносіцца вонкі.
Даведайцеся падрабязнасці ў акаўнце гульні.
Падзяліцца меркаваннем: @ex_presslive
Добро пожаловать в реальность!