У Мінску адбылося ўручэнне прэмій “Залаты апостраф”

Cёлета гэтая прэмія ўручаецца ўжо дзясяты раз. У якасці спецыяльнага госця падтрымаць святочны настрой бый запрошаны вядомы паэт, бард Алесь Камоцкі, піша БелаПАН.

Лаўрэатам прэміі ў намінацыі "Паэзія" стаў прадстаўнік старэйшага пакалення, пісьменнік і перакладчык Алесь Разанаў за публікацыю "Столькі і гэтулькі". Адрывістыя і кароткія, але складаныя паводле сваёй структуры "паэтычныя пункціры" Разанава прызнаныя наймацнейшымі за вершаваныя творы іншых намінантаў.

Аўтарам лепшага празаічнага твора стаў паэт і празаік Алесь Паплаўскі са сваёй аповесцю "Lapido", напісанай у 2011 годзе паміж Прагай і Брэстам.

Намінацыя "Дэбют" знайшла свайго фаварыта ў асобе маладой журналісткі і празаіка Марыны Яўсейчык за публікацыі з цыкла "Казкі лесу.

Спецыяльны прыз "За ўклад у сучасную беларускую літаратуру" прысуджаны пісьменніку, публіцысту і перакладчыку Анатолю Кудраўцову "за непасрэднае дачыненне і дапамогу пры стварэнні часопіса, вялікае пісьменніцкае майстэрства і высокую якасць твораў".

Сёлетняя, юбілейная, прэмія шмат у чым стала адметнай, адзначыла прэс-сакратар СБП Віка Трэнас. "Хацелася б адзначыць, што ўпершыню лаўрэатам прэміі стаў літаратар не з Мінска. Я маю на ўвазе Алеся Паплаўскага, які жыве ў Брэсце, — сказала яна. — Апроч таго, ў межах нашай сёлетняй прэміі адбылася адмысловая дабрачынная акцыя — атрыманую ўзнагароду Алесь Разанаў вылучыў на дапамогу сваім калегам-пісьменнікам".