У снежні Еўропа пахне хвояй, карыцай і чаканнем. У вітрынах — свечкі і яшчэ мільён упрыгожанняў, у вокнах — зоркі, а на рынках ціха патрэскваюць каштаны. Пра сваю любімую страву EX-PRESS.LIVE распавяла ураджэнка Беларусі Вікторыя.
— Маё Раство тут іншае, чым дома, і ёсць адна традыцыя, якая з’явілася тры гады таму, на Раство. Я гатую карпа. Гэтая рыба на калядным стале — звычайная справа для многіх еўрапейскіх краін. А я гатую карпа проста. Без лішняй вычварнасці, але з павагай — да прадукту і да памяці, — кажа яна.
Як я гатую карпа да Калядаў:
— чышчу і старанна прамываю рыбу,
— націраю соллю і перцам,
— дадаю цыбулю, трохі часнаку і лустачкі цытрыны,
— запякаю з кропляй аліўкавага алею і галінкай чабору.
— Пакуль карп павольна даходзіць у духоўцы, уключаю ціхую беларускую калядную музыку — Вольскага, Вайцюшкевіча і яшчэ шмат рознага… нашага, — кажа беларуска.
— Эміграцыя вучыць простым рэчам: цаніць цішыню, цеплыню і магчымасць ствараць свае маленькія рытуалы. Калядны карп — не пра ідэальны рэцэпт. Ён пра дом, які мы носім з сабой. І няхай гэты дом сёння ў Еўропе, ён усё роўна гаворыць са мной па-беларуску.
Хочаце прыняць удзел у акцыі? Дасылайце свае рэцэпты з фота: @ex_presslive
Добро пожаловать в реальность!